Facebook名片

2013年5月23日 星期四

Episode List

Finale

「橋,大Dee呀。你起身未?」電話來自多倫多:「有個消息想話你知。」

「大Dee哥,香港家陣六點幾咋。」我晨早被人嘈醒,難免有點脾氣:「有咩大新聞要咁急講我知呢?」

「拿,你聽住。」大Dee語氣變得好認真:「今年十一月,我要同Angie結婚了。」

我當堂醒了一醒:「你講堅牙?恭喜晒喎!會唔會擺酒?」

「會呀。不過會響多倫多呢邊擺。」大Dee說:「你同心穎會唔會有時間過嚟飲?」

「大Dee哥結婚喎!」我答:「我地幾唔得閒都一定飛過嚟飲你果餐。你Call咗高佬文未?要唔要幫你話佢知?」

「未呀,confirm咗日子之後,我第一個就call你。」大Dee說:「高佬文我轉頭會call佢架啦。最好你地兩個都一齊番嚟,等我地以前隊波,可以齊腳踢返場元老賽。」

「好呀,不過依家跑唔郁啦。」我苦笑:「有冇嘢要我幫手?」

「就係有呀。」大Dee:「我知你不嬲鍾意影相,你應該有好多我地以前讀書果陣一齊影過既相啦!可唔可以幫我揀幾十張出嚟send俾我,我用嚟做slide show的。」

「挑,梗係得啦。Weekend前交貨俾你。」

大Dee係我去多倫多讀書果陣,落球場黐波踢所認識第一個朋友。由香港去多倫既機程,頭尾要成十五、六個鐘,長係長咗啲,不過人生冇幾多個老死,佢地人生既呢啲重要moment,我係的確唔想錯過。

人長大咗之後,去飲既次數越黎越多。去飲,變得越黎越例行公事,而且絕大部份時間其實都係俾面派對。不過,真正好朋友既結婚酒,感覺係好不一樣的。你跟好朋友曾經一齊成長過,當見證佢踏入人生另一個階段既時候,感覺其實係好特別。每個人背後都總有一點故事,大Dee早幾年曾經大病一場,幾乎連條命都冇埋。就係呢個Angie,響大Dee患病既時候,一直陪伴響佢身邊。今日大Dee可以同Angie拉埋做夫妻,作為老友既,點會唔戥佢開心?

*****

大Dee叫我幫佢揀相,星期五晚放工,我就約埋心穎,一齊上咗我屋企幫手。

我影相其實一啲都唔叻,美術天份嚴重不足。我只係鍾意影相,影低一啲我覺得美好既moment,讓自己留個紀念。

「喂,揀呢張丫!」我指住電腦螢光幕:「呢張又齊人,大家又笑得開心。」

「呢張唔得呀,橋!」心穎搖了搖頭:「你睇吓邊個企響高佬文隔離?係佢個ex呀。呢張相,如果真係用嚟做slide show響banquet度播出嚟,高佬文同佢girlfriend會好尷尬架。」

「都係你夠細心。」我跟心穎說:「咁不如呢張丫!今次高佬文身邊冇人啦!」

「用呢張你想死呀!」心穎用力敲了一下我頭殼:「呢張相,大Dee拖住果個唔係Angie嚟架!果陣大Dee都未識Angie,你交呢張相俾佢地,Angie嬲死你呀。」

「唉,乜咁煩架…」我簡直想仰天長嘆:「我仲以為,我有咁多舊相,揀幾十幅俾大Dee會好容易添。點知呢幅又唔得,果幅又話有個ex響度,黐線架咩。」

「哈哈,咁你就怪你班老友花心囉,成日都換畫。」心穎笑著說:「快啲揀啦,你應承咗weekend前要send俾人架。」

如是者,那個星期五既晚上,心穎同我就不停響度揀呀揀。剛才果啲揀相既「問題」,不斷地出現,令到揀相既進度變得好緩慢。

呢一晚,心穎同我go through咗差不多所有過去十幾年既相片,由我地響中學既時候初相識,去到現在大家都長大成人,接近三十而立既時候既相片都有。睇舊相,其實有時會覺得好唏噓的。一來感覺到時間飛逝,儘管心態上有時仲覺得自己係個teenager,但面容既改變,記錄咗響相片上面,呃唔到人的。今日既我地,已經係徹徹底底既成年人,一班需要為自己、為家庭、為身邊既人承擔起大量責任既成年人。

另一樣讓人感到唏噓既係,隨住身邊既朋友,跟自己既另一半離離合合,有新人加入,但又有舊人離開,好多曾經響相片中出現過既人,現在其實都已經響我地既生命裡面消失了。睇相既時候,偶然會勾起些少同呢啲人相處既片段,但影像已經開始變得模糊了。至於佢地依家既生活係點?做緊啲乜嘢?分手之後,有冇搵到更適合自己既另一半?我地完全係無從得知。

心穎跟我一路揀相直至夜深,因為之前一晚佢響公司開夜既關係,揀相既過程去到後段,心穎以經頂唔順,在梳化上睡著了,剩低我一個人,獨自對住電腦螢光幕,一路重覆翻睇這過去十幾年跟一班好朋友所拍低既舊照片。

那一晚,響呢堆舊照片裡面,我有一個很強很深既感受。

舊相片裡面,有好多過客。朋友身邊既另一半,十幾年來總出現許多新舊交替既畫面。但當看過所有照片之後發覺,唯獨是我,身邊的一直是同一個你。

最感恩既係,即使去到今日,陪我一齊重溫呢堆舊照片既,依然係你。

*****

十一月既時候,心穎同我都拎咗一個禮拜既假期,飛去多倫多參加大Dee既婚禮。

自從畢業之後,就從來冇返過去了。單單係諗起,可以跟從前果班老死聚聚舊,就已經開心死了。

準備上機過海關既時候,我刻意讓心穎行在我前面。我小心地將手提行理放上X光機檢查,然後徒手行過金屬探測器,殊不知金屬探測器響過不停。

那位女關員於是指示我行到前面,讓她們用裝置掃描一下我的衫袋褲袋。

「先生,麻煩將褲袋既嘢拎出嚟丫。」女關員有禮貌地說。

我有一點為難,一直支支吾吾,直至我見到行在我前面既心穎行得比較遠了,我才鬼鬼祟祟地從左邊褲袋,拿了一件有金屬成份的小東西出來。

「師姐,唔好意思呀。」我跟那位女關員打了個眼色:「有啲嘢求先唔方便拎出嚟過機。」

女關員望了望我手上那件小東西,笑了笑:「先生,冇嘢啦,你衣家可以走了。祝你好運。」

*****

大Dee既婚禮,規模並唔大,儀式亦都相當簡單。我響婚禮上面,見返一大班從前既老朋友。儘管個banquet並唔甚麼六星級豪華盛宴,但係充滿住許多朋友、家人相聚既歡樂氣氛。我好耐未試過好似果一晚,可以笑得咁開心了。

我知咁樣講,可能有點刻薄。但當婚禮去得越嚟越多既時候,有一些新人,儘管我把口仍然會虛偽地講些甚麼「祝你白頭到老永結同心」之類既廢話,但實際上,我內心係冇辦法真心地恭喜佢地的。因為你知道,呢啲朋友,即使去到結婚一刻,其實仍然未長大。婚禮講得白一點只係一場show,婚後既生活,先至係真正既考驗。即使響婚禮上面,新郎新娘把口,講到話幾咁愛佢另一半都好,但實情係,響佢地既心裡面,自己仍然先至係最重要。當響結婚既一刻,佢地既想法仲係停留響呢個階段,到面對婚後更嚴峻既reality check既時候,佢地結果會變成點樣?

這種新人「還未長大」既感覺,不論婚禮背景有幾華麗,場面有幾熱鬧,只要你用心睇,其實都係呃唔到人的。我enjoy大Dee既呢一個Banquet,因為我覺得,佢同Angie都已經突破咗呢一條界線,佢地既感情已經成長了。我可以真心地戥佢地高興,而且相信佢地日後既感情,只會越嚟越好。

*****

婚禮之後,心穎同我繼續留響多倫多幾日,享受我地少有既長假期。我租咗架車,同心穎周圍去,去番好多以前同佢曾經去過既地方。多倫多有樣野比香港好,就係「慢」。幾年冇踏足香港既朋友,每次返到去,都覺得香港變晒,變下變下連天星碼頭都會唔見埋。多倫多嘛…儘管城市還是會慢慢轉變,但起碼心穎同我以前去過既地方,絕大部份都仍然響度,冇乜大變。重遊舊地,感覺蠻好的。

「我第一次約你出街食飯,咪係呢度囉。」汽車行到以前學校附近既一個小商場外,我指住商場裡面果間餐廳仔:「十幾年都仲係咁既樣,都唔肯花錢裝修吓!」

「難得有啲嘢,十幾年都冇變嘛。」心穎嘆了口氣:「唔容易架。」

冇錯,十幾年都冇變的確好難得,不過我忽然響度諗,心穎同我一齊十二年了。雖然每日我地都係一齊,但當中既感情關係,又係咪真係完全冇改變過?

我覺得人其實好自私的。當一個男孩子,最初睇上另一個女孩子既時候,九成既原因,都係因為外表的。男孩子同女孩子當初互相撻著拍拖,當中既理由我覺得其實亦都好自私既…就係希望響對方既身上,讓自己獲得一點快樂。然而日子一日一日咁過,男孩子同女孩子透過每日既相處,一點一滴累積咗一點感情。大家既感情既關係,亦會起咗一啲微妙既變化。由最初只係希望,喺對方既身上得到快樂,慢慢加入透過自己既付出,去讓對方得到快樂。這個轉變,很微小,甚至是不知不覺的。到了有一天,你會完全忘記咗,當初要響對方身上要賺快樂給自己既「目標」。取而代之,係將付出變成習慣,但求對方開開心心地過每一日。去到呢個時候,「自己」響一段關係裡面,已經變得微不足道了。

人既本性係自私既,但一段完滿既關係有時卻會將人性醜惡既一面徹底轉變過黎。人生能夠遇得到這種關係,其實係運氣。

「不如返去以前學校睇下囉。」我沒有等心穎回答,便把車掉頭駛向以我們讀書的那間學校了。

「嘩,真係冇乜點變喎。」我下車走到學校後門:「仲未鎖呀,入去行個圈丫。」

「橋,就快天黑啦。」心穎拉住我:「陣間有人鎖大閘,我地出唔返去就麻煩啦!」

「行個圈好快之嘛,大閘鎖左最多爬窗出去囉!」我少有唔聽心穎嘅說話,二話不說就拖住心穎走了入學校裡面。

我拖著心穎,沿着那條旋轉樓梯行上二樓,途經那些課室、locker...雖然已經好多年冇返過嚟,不過當回來嘅時候,感覺還是如此熟悉。

「Rm 205呀。」我指往那個班房門外嘅門牌。呢個205號班房,就係當日我第一次見到心穎嘅地方。

我吸了口大氣,緊緊拖住心穎,然後推門走進去。那些陳設,還是跟十二年前一模一樣。我望住班房前面塊黑板,當年心穎跟住老師走進來,自我介紹的一幕,忽然好像重現我眼前一樣。那個屬於我嘅奇蹟,係十二年前響呢個地方發生的。

走進了這個房間,心穎左望右望,忽然她跳到去那塊黑板前面,扮了一個鬼臉,然後鬼馬地說:「我叫連心穎,來自香港,今日第一日嚟呢度返學,請各位同學多多指教!」

就像當年一樣,心穎自我介紹完之後,便向我伸出右手,作了個準備握手狀。

我望住眼前這個畫面,一下子完全說不出話來,只是呆呆地站在心穎面前。

「橋,你冇事嗎?唔好嚇我...」心穎見我樣子怪怪的,也有點緊張起來。

我在褲袋裡拿出那件小東西,並將盒子打開,深呼吸了一口氣:

「連心穎同學,十二年前,我喺呢度第一次見到你。十二年後嘅今日,喺同一個地方,你可唔可以答應我,做米梓橋同學嘅太太?」

我是為了兌現承諾而來的。

*****(全文完)*****


後記

2013年,北京首都機場。

我在候機室內,望著那塊航班顯示屏不停地閃呀閃。周圍的旅客媽聲四起。

「老婆,我班機delay了。」我連忘打了個長途電話回家:「今晚趕唔切返嚟同你地食飯啦。」

「噢…」電話既另一邊傳來心穎既聲音:「等我仲買咗白灼蝦添。唔緊要啦,你自己最緊要小心啲,我留飯留餸俾你啦。」

「Thank you 老婆。」我說:「光頭仔今日乖唔乖呀?」

「哈哈,都係咁啦。」心穎說:「今朝你阿爸阿媽嚟探過佢,仲買咗架新既火車頭Thomas俾佢。你個仔家陣笑到見牙唔見眼呀。」

「又買玩具?」我怪叫:「呢個爺爺,硬係講極都唔聽。個孫遲早俾佢縱鬼壞。」

「算啦老公。」心穎還是一貫淡定:「難得老人家咁開心,你個仔又開心,冇所謂啦。」

「得啦老婆。」我說:「咁大頭妹呢?有冇扭計呀?」

「幾個月既BB,有幾扭計丫。哈哈,佢眼仔碌碌咁等你返嚟囉。」心穎說:「咁你班機要delay幾耐呀?」

「Announcement話差唔多要兩個鐘,大陸機場真係麻煩,鋪鋪都係咁既。」

「嘩,成兩個鐘喎,咁你有乜做?」

「hmmm…寫稿囉。等飛機最好就係寫稿架啦。」我說:「不過有樣嘢要你幫手,我響呢度呢,上唔到自己個Blog同Facebook,我唔記得咗自己之前篇稿寫到邊。你可唔可以去我個blog度,cut and paste我對上果篇稿,然後send去我email果度?」

「好,轉頭幫你啦。」心穎說:「不過老公,你呀,吹水真係吹得越黎越過份啦。」

「講咩呀?」

「你blog上面個故仔呀,寫得太誇啦。我邊有你寫得咁好呀?你好似自己『幻想』一個老婆出嚟咁喎。如果真係有一日,人地見到我真人既話,實會投訴貨不對辦。」

「老婆,我唔係亂吹架喎。」我說:「我真係覺得你係咁的。」

「唉,越老越口花啦你。我費事同你講。」心穎老沒好氣地說:「你落咗機就打電話返嚟啦。」

掛了線後,我在候機室找了個位置,翻開我部notebook,心穎既電郵已經收到,可以繼續將個故事寫下去了。

1992年嘛…這是個廿年前既故事。

廿年之後,you are still the apple of my eyes.


祝大家有個愉快既週末。

Click here to add 米梓橋 on your Facebook.

2013年5月22日 星期三

Episode Seventeen

我必須承認,我只係一個普通既男人。我喜歡漂亮既女孩子,面對誘惑,亦會有正常男人既生理反應。

響男人既行為模式裡面,「細佬」既地位,舉足輕重。大腦同埋細佬既關係,有時好似一個老闆同一個喜歡自把自為既伙計一樣。當面對誘惑既時候,場面就好似老闆同伙計,鬥智鬥力既角力一樣。最後誰勝誰負,好多時都只係一念之差。

*****

「Ashley,十點幾啦喎,仲唔走?」我問。

Ashley轉身望住我,我見佢臉頰有點紅,大概係飲過點酒。

「我本來走咗。」Ashley站立起來,緩緩向我走過來:「不過知道你今晚開夜,忽然想返嚟搵你。」

我望住Ashley既眼神,我知道之前心穎所提過既「行動升級」應該會響往後既幾分鐘內發生。我吞了吞口水,個心跳到幾乎休克咁滯,心諗:「仆街嘞,呢鑊點算呢?」

Ashley走到我跟前,一手就攬住我,然後響我耳邊,用微弱既聲線說:「CK,我知道你有個拍咗好耐拖既女朋友,不過,試下俾個機會我,你知我對你點的。」

這種經驗,我真係從來都未試過。我覺得我應該係被嚇親,所以當Ashley一手攬住我既時候,我基本上係一碌木咁企響度,完全唔識得郁。

「只要你願意,今晚我係屬於你的。」

我人生既第一次「豔遇」,係咪就會響今晚發生?

又或者,我應唔應該俾佢發生?

由Ashley伸手攬住我,去到響我耳邊講完果兩句說話,頭尾大約都只係十幾秒既時間,我個腦袋,閃過咗無限個問題。好明顯,響呢一刻,我既腦袋同細佬,分別向我既身體發出兩個截然不同既指示。

細佬同我講:「上啦,有得食唔食,罪大惡極呀。食咗先算啦。」

腦袋即刻反駁:「咪亂嚟呀,你諗清楚,咁多年嚟,心穎點樣對你?你對得佢住?」

細佬又駁咀了:「超,你唔講,我唔講,邊個知呀?happy咗先算啦。」

腦袋:「橋,就算你呃到心穎,你呃唔到自己呀。你接受得到要對住心穎講大話咩?你接受得到,呢一世都要有一件事瞞住心穎咩?」

一講到要瞞住心穎,我知道這場交,腦袋應該佔上風了。響日常既工作之中,我係個既虛偽,又常常有好多事情隱瞞既人。但係面對最親既人,我接受唔到自己對佢有任何隱瞞。今日如果我真係聽從細佬既說話,做咗件唔應該做既事出嚟,我會唔會有膽量,將今次既犯錯,如實地向心穎講出嚟?如果今日做錯呢件事,即使我有本事瞞得過心穎,但係我願唔願意,守一個永遠都唔能夠講出口既「秘密」?

我知道,我唔願意。

心穎我係一定會娶的。而我唔希望,響往後既日子裡面,我同呢個女孩子,要有任何丁點兒既東西需要隱瞞。

腦袋知道佢處於優勢了,於是得勢不饒人:「橋,我俾多兩條片俾睇。睇完之後,你同我即刻離開呢度。去片!」

於是,有兩個畫面忽然響我眼前閃過。

第一個畫面,係一個小時候既米梓橋,問媽咪爸爸今晚去咗邊既畫面。媽咪吞吞吐吐地同我講:「爸爸…有嘢做,要返工,今晚唔返嚟訓啦。」我好失望,因為今晚又見唔到爸爸。尋日爸爸明明話會返嚟陪我玩的。

睇完第一個畫面,我當堂征了一征。畫面既最後,還活像政府既宣傳廣告一樣,打出了八隻大字:「一晚歡愉,一世後悔。」

我還未定神,第二個畫面就來了。

呢個畫面,很近期的。影像也沒有之前果一個咁模糊。

是那天,我跟心穎講要去創業既那一幕。心穎忍住淚水叫我放膽去試,唔駛擔心佢。我心裡面還誓神劈願地跟自己說,我要讓心穎往後既日子過得好幸福。

你身後有一個咁樣為你既女孩子,你,真係仆街到要做些傷害佢既事?

你同第二個女孩子搭上,咁樣叫做俾幸福佢?

兩個畫面之後,我certify,今日既擂台上面,腦袋徹底K.O.細佬。

我忽然好像從夢境中醒過來,Ashley說完那兩句話,正準備向我既吻過來。

我連忘推開Ashley,向後退了一步:「Ashley,對唔住。我諗你今晚應該飲多咗啦。」

我響度諗,我或者應該多講幾句客氣既廢話,試圖令場面冇咁尷尬,但實不相瞞,果一刻,我其實係有點驚的。我只想聽從腦袋既話,盡快逃離現場:「我趕時間,我走先了。」

我一支箭地衝出大門,頭也不回地直奔去停車場。我坐上自己既汽車上面,心裡面有種好複雜既感覺,覺得好唔舒服…同埋,好想見心穎。

我將車開到心穎屋企樓下,翻開我部手提電話:「心穎,我響你留下,我想見你。」

當心穎落到大廈地下既時候,我從車子裡走了出來,冇講過一句話,便擁著心穎了。抱得很緊,很用力。

被我抱得好緊既心穎,冇問我發生咩事,只係響我耳邊輕聲說:「橋,我喺度。」

「我一直都喺度。」

*****

好多愛情小說裡面既男女主角,都係愛得轟轟烈烈,死去活來的。響佢地既戀愛故事當中,佢地既眼裡面,亦永遠永遠只有對方,彷彿全世界只係死剩佢地兩個咁款。

我一向覺得,小說就係小說,有些情節係有一點違反人性的。我作為一個正常既男人,即使你有個又靚又索既女朋友,忽然有另一個靚女行喺你面前,你真係會望都唔望一眼?女孩子縱使有個既英俊又有錢既男朋友,見到靚仔行過又真係有本事可以視若無睹?

我唔信囉。

我結婚既時候,班姊妹曾經稱讚我係一個專一既男仔,拍拖十幾年居然冇出過軌。我同佢地講,你如果覺得我冇出到軌係勁既話,心穎則比我勁不知幾多倍了。結婚前既日子,我就只係面對過Ashley既一次誘惑咁大把,比數其實都只係小勝一比零。心穎就唔同喎,由細到大,男孩子既誘惑不斷咁響身邊出現,佢居然冇離開過我,呢個我先覺得係個奇蹟。

Ashley既一次經驗,讓我對「專一」呢個詞語,有重新既體會。亦開始理解心穎所講「你試過就會明白」既意思。兩個人既關係裡面,總會面對一點誘惑。大家都係正常人,面對誘惑既時候,有時會有點心動,總難避免。問題係,你響心動過後,你是否有本事拒絕誘惑?當然,拒絕誘惑所依賴既,係及時既理智。但抗拒誘惑更重要既原素,其實係彼此既關係。你跟另一半關係夠好,彼此既相處讓你感受到足夠既幸福,面對誘惑既時候,你自然會諗多一步。你願意為咗一晚既歡愉,放棄多年累積下來既幸福?你真係願意親手傷害那個對你不離不棄嘅人?

感情是會累積的,一點一滴地累積下來。累積得夠多,抵抗誘惑既能力,理應就越強。唯獨是感情同幸福,所累積既份量,往往卻未必跟時間成正比。那些會出軌既男人,好多都係結婚好多年。於是疑問就來了:點解一起相處咁多年,男女雙方仍然冇累積到足夠既幸福同感情?到底响邊度出咗問題?

聰明既女孩子,總懂得如何響另一半既心裡面,一點一滴地累積幸福既感覺。這些東西,很微小的,但她們每天都在做。要找個詞語去形容這種感覺嘛,是有點困難。比較接近的形容詞,我想大概是「窩心」吧。然而我卻肯定呢種,並唔係愛情小說裡面,果種轟轟烈烈既感覺。到咗今時今日,望見好多朋友,響婚姻上離離合合,我綜合出一個小小既結論…

果啲愛得越轟烈,過程越浪漫越夢幻既戀愛故事,結局往往都係…麻麻地的。

Click here to add 米梓橋 on your Facebook

Episode Sixteen

Vincent單嘢,好快就成為了心穎同我之間既一個「笑話」。成件事既setup,唔湯唔水咁。你究竟係想玩我地一舖當出啖氣,抑或仍然對心穎有點意思想撬我牆腳?還是只係想響一個曾經拒絕過你既女仔面前,顯示一下家陣自己幾咁有錢幾咁有面?唉,咁樣講可能有點刻薄吧,但呢條友,我覺得實在係太低能了。經過咗十年有多既日子之後,佢查實同以前,可能真係冇進步過。我唔敢講佢係咪一個壞人,不過話佢係個「蠢」人,應該唔會點錯。

至於果份「名貴」禮物嘛…咁既環境,對女孩子係咪真係會有吸引力既呢?

「禮物其實係多餘既。」心穎說:「如果真係選擇上房,個大獎應該係Vincent呢個鑽石黃老五,反而唔關份禮物事。講真,如果個女仔真係睇中Vincent,想同佢發展落去既話,即使冇一份咁既禮物擺響眼前,個女仔都可能會上去架啦。所以果條鍊,根本就係多此一舉。有錢既人唔等於一定有自信既,我望見Vincent,我反而覺得,佢將自己所有既價值,都放咗響佢既財富身上。佢所有既自信,都係建立響呢啲財富身上,其實幾可憐。呢種男人,吸引唔到我的。」

「錢對女仔嚟講,尤其係搵結婚對象既時候,唔係唔重要…」心穎笑了笑:「只係有好多嘢,比起錢,都明顯更加重要囉。」

「例如?」我問。

「好抽象架喎。」心穎想了想:「唔知點樣講俾你知,哈哈,假如遲下你有機會你遇到,有女仔向你投懷送抱,令你需要作出選擇既時候,我諗你就會明我講乜嘢啦。」

「你講笑定講真呀?」我覺得好似俾人串多啲:「你唔怕到時我真係俾人挾咗去?抑或你睇死我走唔出你手指罅先?」

「哈哈,你諗下,我同你一齊十年有多啦。」心穎說得輕鬆:「如果十幾年感情,只係一次衝擊你就會俾人挾走既話,咁就證明我一直都睇錯人,唯有認命囉。」

「再講丫,如果真係有女仔埋你身,其實可能係好事。假設面前你真係有誘惑出現,而你如果最終能夠抗拒誘惑,選擇繼續同我一齊,我覺得呢段感情可能會更加珍貴。」

「其實講咩都冇用…」心穎笑著拍了一拍我膊頭:「你試過就會明白的。」

*****

後來,我真的試了。

公司既發展響呢兩年都算係幾順利,公司請多咗人,舊既豆腐潤辦公室,已經放唔落所有同事,唯有焗住搬。搵寫字樓既時候,多少有一啲情意結。最初出嚟做嘢既時候,因為心穎返交易廣場,而我卻響觀塘返工,每次放工去搵佢都覺得山長水遠好唔方便。果陣我成日同自己講,假如遲下我可以搵番份中環工就好囉。到咗呢一刻,手上終於有一點錢,可以讓自己做一點奢侈既事。雖然以商業角度嚟講,其實係有點浪費既:高佬文同我,決定租下一個響中環既寫字樓作為基地,算係正式開始咗《人在中環》既生活。

因為公司業務性質既關係,我請既同事,幾乎清一式係女孩子。我其實一向冇乜女人緣,亦唔係特別懂得同異性溝通。一下子身邊出現一班年輕女孩子,講真其實係幾唔慣的。由於公司規模唔大,作為老闆既我,係逼於無奈地要處理好多「女孩子之間」既人事問題。久而久之,班同事對我既信任亦因為幫佢地處理得呢亭問題多而增加了。增加咗信任係咪好事呢?其實幾兩睇的。由於我公司唔係咩跨國大機構,出手永遠冇可能追得上大公司既package,同事跟你信任夠,關係密切既好處係,會減低員工既流失,而同事亦願意為你賣命工作。至於唔好既方面嘛…同事搵我傾訴同尋求意見既事情,則變得越黎越廣泛…除咗工作之外,有關佢地家庭、以至個人,甚至感情上既困擾,有時都會搵我傾傾計。我其實覺得幾唔妥當的,好多時其實我都唔係好想掂到佢地呢亭私人事,但當日經驗尚淺既我,卻唔係好懂得推卻。最終我既房間,好似變咗一間專為同事們而設既心理治療室一樣。

果陣,有個女同事叫Ashley,從外國剛讀完書番嚟,因緣際會嚟咗我公司返工。Ashley做嘢,其實幾細心,樣子也長得幾OK的(男人都係咁既…對樣子長得比較好睇既同事,總會不自覺有一點偏心的。),呢個同事,我其實蠻喜歡的。Ashley入嚟做咗半年左右,佢爸爸就因為心臟病突然過咗身。因為呢件事,佢響我辦公室房間裡面大喊過幾場,我查實乜都做唔到,亦冇乜意見俾得到佢,除咗靜靜地聽佢講嘢,與及供應大量tissue俾佢之外,我查實冇嘢可以做。

不過響我間房喊過幾場之後,我開始覺得Ashley對我既態度有少少唔同咗。遲鈍如我其實也feel到有多少唔妥,只是她沒有跟我說過些甚麼,又或者做過些甚麼,我也就只能繼續裝作「若無其事」地如常返工,如常跟她相處。

後來有一次,公司接了單大生意。為此我跟一班同事在放工後一起去附近的酒吧慶功。大夥兒都喝了點酒,嘻嘻哈哈,氣氛蠻好的。忽然間,有人在我耳背狠狠地吻了一下。我嚇了一嚇,回頭一望,見到Ashley對著我微笑。

我不知道這個場面,有沒有其他同事看見,但我得承認,那一刻,我個心跳到好似剛跑完馬拉松一樣。

「Ashley,你飲醉啦。」我故作鎮定地說。

「你醉我都未醉。」Ashley跟我扮了個鬼臉,便拿著手中既酒杯,走了過隔離檯跟其他同事傾計了。

我也許係真係太純情了,從來都冇遇過呢種事情。問心講,果一刻既感覺,其實好特別,也不知道是應該開心還是唔開心。本來接咗單大生意之後,心情應該好興奮的,但無啦啦俾人咀咗一啖之後,響酒吧裡面,我完全冇辦法說出話來。

「哦?發生咗件咁既事?」第二日,呢件事困響我心裡面總係唔係好舒服,我還是將這件事,一五一十地跟心穎講:「哈哈,橋,你終於都有豔遇啦。」

「你咁係咪算係串我呢?」我老沒好氣地說:「我估佢可能飲大咗…加上響外國住得耐,有啲鬼妹仔性格遮…」

「你響度自己呃自己啦。」心穎帶點取笑我既眼神:「你其實自己知道佢應該對你有啲嘢丫,你呃自己都冇用格。」

「咁我可以點先…」我嘆了口大氣:「唔通因為俾佢咀左啖,要炒咗佢咩!」

「哈哈,睇黎我既男朋友仔呢次真係嚇親喎。」心穎說:「我諗你響呢個階段,都係冇乜嘢可以做架啦,都係如常咁工作,如常咁相處囉。不過呢,我估佢錫過你之後,遲下可能會行動升級都未定。你如果對人冇意思既話,自己就小心啲避忌啲囉。心動既話就當然另計。」

「黐線,心動條命咩。」我都唔知自己係咪有啲心虛,所以回答既反應出奇地快。

也許係呢個反應出賣咗我吧。心穎定眼望了望我,大家都靜咗落嚟,沒有說話。

沉默了好一會兒之後,心穎深呼吸了一口氣,然後將手按輕輕著我既胸口。佢既手心,應該感受到我那異常急速既心跳。

「橋,我信你唔會亂來的。」

「嗯。」我點了點頭。

「你會處理得好好的。」

「嗯。」

酒吧果晚之後既一個星期,一切如常。Ashley並冇如心穎所講,有任何「升級」既行動。直至星期五晚上,我獨自留在辦公室裡準備下星期既presentation。週末前夕,我以為同事們早就放工走曬,點知我一推開我既房門,就見到Ashley還坐在自己的座椅上。

我的心跳忽然又來了。

Click here to add 米梓橋 on your Facebook

2013年5月21日 星期二

Episode Fifteen

有冇試過,有啲嘢你一直以為係理所當然,經過咗十年八載響社會上面打滾之後,忽然睇番轉頭,發覺原來根本並唔係你所諗既果回事呢?呢亭咁既經驗,我有一大籮。

其中一樣對我黎講比較深刻既,係有關響社會上面要贏人,夠竟係鬥緊啲乜嘢。

剛剛畢業,初出社會做事,我天真地以為,在商業社會上要贏人,係講個人既能力的。呢個世界,乜唔係鬥你有幾叻架咩?後來我見世面多了,自以為開始成熟世故,並愚蠢地相信自己「睇得透」了,諗法也變得有點負面:於是我又以為,呢個世界,幾叻、能力幾高都都冇用,真正在鬥既,其實係背後既關係、背景同手段。呢個「自作聰明」既諗法維持咗一段短時間,直至做咗生意之後,睇法又再一次被巔覆。

如果你今日問我,商業社會裡面要贏到人,鬥既到底係啲乜嘢,我既答案會係一個「韌」字。是的,出嚟做嘢既日子越耐,就越發覺呢個世界,其實真係唔係鬥你有幾「叻」,而係鬥你有幾「韌」的。叻既人可能會有一次半次發光發亮既moment,但係能讓你笑對最後,必然係那一個「韌」字。

如何解釋這個「韌」字,我文筆拙劣,冇本事將當中既神髓清楚表達出來。不過好幾年前,洛奇電影裡面,Rocky跟佢個仔講既一段說話,我覺得好有意思,係我既all time favorite,呢一段,可能你地都曾經睇過了。果段電影對白,我print了出來,長期貼咗響我辦公室房間裡面既牆壁上,提醒自己,怎樣做人才會有機會贏。這些既簡單又基本既東西,像我這種善忘而且意志力薄弱既人,總係時不時就會忘記:

"The world ain’t all sunshine and rainbows. It is a very mean and nasty place. It will beat you to your knees and keep you there permanently if you let it. You, me or nobody is going to hit as hard as life. But it ain’t about how hard you hit, it is about how hard you can get hit and keep moving forward, how much you take and keep moving forward. That’s how winning is done."

有關這個「韌」字,做生意如是,做人如是,維持一段關係,大概也如是。

*****

捱過沙士果一年之後,高佬文同我既公司,慢慢企穩咗陣腳,生意亦開始好起上黎。手停口停既日子,亦逐漸離我而去。我同自己講,谷底可能真係已經過去了。

果一年,響心穎既身上發生咗一件小事,一件讓我印象深刻既小事。

「記唔記得,中學果陣果個Vincent?」那天心穎上了我的辦公室:「Vincent Yu呀。」

「Vincent Yu?」我一邊回答心穎,眼睛繼續望著辦公桌上的laptop:「Grade 12果陣追過你,送咗隻勁大啤啤熊公仔俾你果個?」

「嗯,係佢呀。」心穎說:「佢家族有間控股公司,原來係我公司嘅客。之前公司搞嘅cocktail party裡面撞到佢。」

果個Vincent,我記得。我地仲讀緊中學時候,某個情人節無啦啦響學校走去同心穎「表白」。心穎同佢講,話佢知已經有男朋友,所以唔可以接受佢。本來以為心穎拒絕咗佢,事情應該就告一段落了。點知心穎拒絕佢果一刻,Vincent忽然好似情緒失控咁爆喊。

當時,學校裡面有個學生攝影會,Vincent同我都係攝影會既會員。當日Vincent同心穎表白既地方,亦正正係攝影會既會址。唔知係Vincent唔好彩,抑或佢之前得罪過人,佢同心穎表白後爆喊既畫面,居然有人拍低咗相片,第二日仲被人貼到通學校都係。Vincent話晒係個有錢仔,不嬲都「威」慣,果次對佢黎講,其實係相當冇面的。無辜既係,佢一直認為呢件事係心穎夾埋我一齊玩佢既,不論我否認咗幾多百次,佢都係唔肯相信。

我覺得心穎應該有啲嘢想講,於是我停下手上既工作:「哦。佢約你?」

「我地交換咗張咭片,本來諗住都係循例既遮。」心穎說:「不過佢今日真係打嚟公司約我過兩日食晚飯。」

「咁你想唔想去丫?」我問。

「雖然好多年前,兼且果陣大家都仲細…」心穎嘆了口氣:「不過我當年始終請過佢食檸檬,總覺得有點尷尬。」

「咁咪唔好去囉,唔推得咩?」我說。

「本來諗住推既,不過佢同我老細講,話以前同我係舊同學,已經好耐冇見想搵我食飯聚下舊…」心穎搖了搖頭:「老細話,畢竟佢係公司既客人,而且唔算係細客,幫公司同客人食餐飯都冇乜問題遮,所以叫我盡量唔好推。」

「嘩,咁都得?」我心裡有點不滿:「咁當我女朋友係咩呀?」

「橋,你會唔會唔高興?」

「我呢邊你就唔駛擔心啦,我冇問題的。」我說:「我只係唔高興,自己女朋友要被老細逼做啲唔鍾意做既嘢遮。」

*****

Vincent約咗心穎食飯果晚,我一個人獨自留響灣仔既辦公室工作。

差不多十點左右,我既電話響起。

「橋,我響太古廣場,依家方唔方便過嚟接我?」電話裡面傳黎心穎既聲音。短短兩句說話,聽得出心穎似乎有一點唔高興。

「係唔係Vincent激親你?」我有點擔心。

「放心,我冇事。」心穎說:「唔講咁多住啦,你盡快過嚟pick up我。我想快啲見到你。」

「OK,我衣家去攞車,十分鐘到。」

我心裡面有點不安。十幾年前大家算係有過一點「過節」的。理智話我聽,當時大家年紀都細,可能處理得並不太理想。但現在既我地都長大成人了,心智也該成熟了許多吧?N年前仲係中學生時所發生既過節同誤會,經過咗咁多年,都應該唔會再放響心啦掛?但係另一方面,我心裡面又不自覺有點擔心。假如Vincent係個小器鬼,咁多年前既嘢,都仲係「放唔低」既話,今次佢既身份係心穎公司既「重要客戶」,要留難作為「打工仔」既心穎,其實話都冇咁易。心穎同我講,話Vincent約佢食飯果陣,我個心都係有些少唔多好既預感。剛才聽到心穎既聲音,就更加覺得唔安落了。

去到太古廣場,心穎很快跳上了我的車上。

「Vincent冇對你點嘛?」我問。

「我其實唔知點講。」心穎嘆了口大氣:「可能只係我諗多咗掛。」

「究竟咩事?」我追問。

事情原來係咁既。

Vincent約咗響酒店既餐廳裡面晚飯。晚飯既時候,Vincent一路都表現得好有風度,一啲都唔似有任何異樣。食到甜品既時候,Vincent忽然問心穎,佢係咪仲係同我拍緊拖,又問佢我做緊乜嘢工作…心穎自然也如實回答了。點知Vincent話,佢見番心穎,覺得自己仲係對心穎有果種feel,佢話,自從佢接管咗自己家族果間控股公司之後,忽然有好多女仔埋自己身,原因係,佢既「有錢闊少」身份終於曝光了。當然,佢話呢啲為咗錢而埋佢身既女仔,佢係非常之睇唔起的。

甜品食到一半,Vincent忽然話要打個電話行開一陣。點知等咗好一陣,心穎都唔見佢返嚟。冇耐之後,酒店餐廳既其中一個waiter走埋去心穎張檯邊,同心穎講咗幾句話:

「連小姐,你張檯既單,余先生剛才已經埋咗了。」

心穎當然聽到一頭霧水,點解餐飯食到一半,Vincent可以忽然唔見咗人?

果位waiter於是將一個花紙包住既禮物盒拿出來,交到心穎既手中。

「呢樣嘢係余先先交帶,要交到你手上。」Waiter禮貌地說:「佢仲交帶話麻煩你立即打開。」

說罷,waiter就禮貌地行開了。心穎撕開花紙,打開那個禮物盒。盒內是一條閃到刺眼既鑽石頸鍊。頸鍊旁邊,則係一張樓上酒店套房既匙卡。

名貴鑽石鍊加一張酒店套房匙卡嘛…我作為一個經常心邪既男人,我覺得,心穎應該冇諗多咗了。

我響度諗,女孩子遇上這種情況,係應該開心還是應該生氣?

「喂,咁依家條鍊呢?」我忽然醒起。

「交番俾個waiter啦。」心穎嘆了口大氣:「交帶咗佢要還番俾Vincent囉。」

「我只係煩緊,聽日返到公司果陣,點同老細講今晚所發生既事。」

*****

後來過咗一些日子之後,某日我倆經過太古廣場既首飾店,心穎定眼望住了其中一條頸鍊好一會。

「做乜望到眼定定?」我問:「鍾意呢個款咩?」

「hmmm…唔係。」心穎說:「我只係睇下,果日Vincent想送俾我果條鍊,同呢條係咪同一條之嘛。」

心穎講完之後,我即時很好奇去望一望果條「邪惡頸鍊」。響飾櫃射燈既照射底下,果條鍊,真係閃到好剌眼。

而那條鍊,原來值廿二萬。

Click here to add 米梓橋 on your Facebook

2013年5月20日 星期一

Episode Fourteen

最近睇波既時候,聽到有一位英超既領隊有一番咁樣既說話:「一場足球比賽裡面,球員『好想贏』,跟球員覺得『必須要贏』,本質上係有分別。勝負既分野,好多時就正正係響呢一點點既分別之上。」

跟心穎對話之後,有關創業呢件事,我既心態出現咗一點很微妙既變化:就正如那位英超領隊所講一樣,這次做生意,我既心態,由本來好想贏,不知不覺地轉變成覺得「一定要贏」。我不能承受再躭誤多女朋友幾年青春既代價。

「必須要贏」呢種心態,對人既另一個影響係,佢會逼使你誠實地面對自己;誠實地去反省一下,你響以前所打過既眾多「敗仗」當中,到底輸響邊度。人既自尊心有一種自我保護既機能,就係當你面對失敗既時候,你總會嘗試去諗千百個理由去「解釋」點解衰咗。然而絞盡腦汁去製作呢堆理由既原因,無非都係話俾自己聽,這些「失敗」實屬非戰之罪,錯不在自己。我返工冇前途只因為遇到個好似七叔咁既仆街老細;我做sales唔夠quota只因俾班老鬼搶x晒啲好客;我讀書不成只因個教授教到不知所謂…總之,以前有乜唔高興唔如意,我總會諗到一個半個似是而非既理由去解釋我既失敗,讓自己心裡「好過」一點,但從來我都冇去反省一下,其實不停失敗既原因,可能只係自己做嘢唔夠認真,學習又唔夠用心,處理事情既時候花得唔夠多心思,追逐一個所謂目標既時候又唔夠決心。

男孩子成長既過程裡面,總會有三幾次感到「開竅」既感覺。「開竅」既時候,你會忽然發覺,從前既自己原來好唔掂,以前自己不斷咁失敗,原來只係自己抵x死。當你忽然承認一直以來既自己其實真係抵死而且唔值得同情,拒絶再為自已編造更多嘅藉口,並認為自己必須要改變先可能會有轉機既時候,你既成長可能就真正出現了。

*****

做咗廿幾年人,呢一次創業可能係人生第一次「認真」去做既一件事。

不過創業呢種事情,唔係你話肯認真做就會保證你有成果的。創業既過程亦永遠都唔會好似想像中咁順利。最初當我話俾人聽,我準備創業做生意既時候,大家都係一盤一盤冷水咁照頭淋的。比較客氣既朋友,會話我既生意冇得做,又或者我太低估創業做生意既難度…總之創業並唔係我想像中咁簡單。佢地好心既話,仲會勸我要諗清楚三思,唔係到時蝕埋啲老婆本就喊都無謂。至於比較唔客氣既朋友、特別係長輩嘛…佢地就傾向話我呢個後生仔唔踏實,妙想天開以為可以一步登天,自己冇料仲咁大想頭想學人做老細,唔見棺材都都唔曉流眼淚,仲要買定花生睇我點樣輸到仆街咁話。

當時我當然冇理會呢班口臭既長輩,照原定計劃拿拿臨地成立咗間公司,響灣仔舊區租咗一個不足三百呎既分租寫字樓,我既「創業」生活就這樣地正式開始了。開頭既時候,高佬文同我單單係處理Charles間廠既project,都已經夠忙了。餘下既時間,我就利用做sales時儲落既client database,幫一班以前舊公司既engine手足,找尋秘撈既機會。而我自己則同班手足協議好,收取「中間人」既利潤。

公司開始既時候,因為有Charles單project頂住,所以生意表面上都尚算係順利。不過其實公司開業冇耐,哥哥就從文華酒店既窗口跳咗落嚟,沙士既個案亦到達高峰,出面個市,其實係前所未有咁淡靜。

Charles單project,大概頭尾做咗接近四個月,到完工收埋尾數既時候,沙士既恐懼已經算係消退得七七八八了。然而病毒消失了,但經濟依舊了無起色,我既公司亦進入咗零生意零收入既日子。我開始懷疑,我會唔會真係俾果班口臭既長輩批中。

因為今次,我係抱住「必須要贏」既呢種心情,當開業不久就遇上呢個情況,個心,其實好慌的。好彩既係,Charles單project,響高佬文同埋一班舊同事既協助之下,算係順利完成。Charles亦有信用地準時找數。呢筆數,夠幫我頂住幾個月,讓我算係有一點時間去重整我既生意。

然而我呢個咁「唔踏實」既人,響最心慌又最諗唔通既時候,講通我,令我最終冇放棄到既,居然係另一個「更唔踏實」既人…即係我老豆。

我老豆其實唔喜歡入賭場的。不過我覺得,佢係一個徹徹底底既賭徒。由佢當年搏咗條命偷渡落嚟香港開始,佢嘅際遇,就不停地大上大落。風光嘅時候佢可以帶住一家人搬上半山豪宅,晚晚大魚大肉;轉個頭落難嘅時候,傾家蕩產餐搵餐食仲要日曰債主臨門。我以前曾經好唔明白,點解佢輸過咁多舖,都依然係咁大膽咁唔識死,每舖都仲係賭到咁大。不過佢話,當日為咗了自由,連條命都幾乎可以唔要,當經歷過一次如此險死還生嘅經驗之後,查實仲有乜嘢會怕吖。

有日我將我嘅困局同我老豆提起,殊不知佢輕描淡寫咁同我講:「唔駛怕喎,小問題遮。」

「小問題?」我怪叫:「再過多幾個月冇生意,公司要摺埋架啦喎!」

「做生意遇著呢亭日子,時不時都會有架啦。」老豆說得輕鬆:「你選擇得做生意呢條路,就要令到自己擁有應付呢啲時候嘅心態至得。」

「超!你咁講同話我知阿媽係女人有乜分別?」我老没好氣地回答:「冇生意嘅時候,乜心態都冇用啦。」

「你咁樣講,我就肯定你其實唔明。」老豆講得有點得戚:「不如我講得白一啲,做生意嘅人,其實應該當自己係...隻小強。」

「咁禪,想噏乜春呀?」我問。

「即係咁,好多做生意嘅人之所以會輸,係因為佢地太過身驕肉貴啦。」老豆忽然一臉認真:「一到冇生意嘅時候就怨天怨地等運到。佢地總係以為,開咗個檔出嚟,有生意係應份嘅,戅居啦!心態錯九晒!實情其實係剛剛相反。由你抛個身出嚟做生意果一刻開始,你就好似俾人掟咗去荒島一樣,你每日嘅工作,就係不停地去求生。荒島上面唔通有電有煤氣爐俾你煮個麵煲個湯咩?你要保住條命仔,有樹皮就要食樹皮,得條蚯蚓響度就蚯蚓都要食架啦。最戅九嘅人係,都以經響個荒島上啦,仲要埋怨島上面冇自己平日食開果啲菜式,咁嘅心態做生意,死x梗啦。」

由細到大,老豆都最鍾意講埋呢亭似是而非嘅道理,我細個果陣,成曰當佢發噏瘋,佢啲道理永冇入耳,不過今日,也許係人生經歷豐富咗,同樣係似是而非嘅說話,但聽落,我卻覺得好似有點意思。

面對逆境嘅時候,人總係會不自覺咁埋怨自己運滯,覺得俾命運玩到自己一楝都冇。但實情係,呢個世界有幾多人係可以唔駛俾命運玩嘅呢?講到命運呢樣,永遠都係佢玩你嘅時候居多,你掌握到嘅時間其實為時甚少。用點樣嘅心態同命運周旋,大概係成長最需要學習嘅技能。

「阿仔,你知命運鍾意點樣玩你呀?拿,佢永遠唔會一鋪玩死你架,不過佢會不斷不斷咁打擊你,慢慢咁陰下陰下陰乾你,等你對自己冇晒信心,對呢個世界冇晒希望,等你慢慢相信,你呢一世都唔會有機會翻到身,到時候呢,佢就真係贏左你啦。」

「仔,等我話你知啦,你要贏到命運,一字咁淺,死唔認輸就得架啦。奇蹟總係會響最後關頭出現既。」

呢句說話,係佢響當時好認真咁同我講的。老豆同我講呢番說話嘅時候,正值係佢事業最低潮嘅時候,呢個時候講呢番說話,自然說服力亦麻麻地,特別係對佢果句「死唔認輸,奇蹟總係會響最後關頭出現」嘅麻木樂觀更加係非常之有保留,不過老豆响破產期滿後,憑住一次機會,居然奇蹟地東山再起。盡管同最風光嘅時間仲有一段距離,不過佢「翻身」嘅時候,已經係個六十幾歲嘅人。一個人到咗咁嘅年紀仲有如此魄力同自信,我其實覺得已經好唔簡單。

也不知算唔算被老豆嘅說話點化,響認為自已必須要贏嘅情況底下,我拒絶坐以待斃。高佬文同我決定將公司轉型...或者正確啲請,應該話係轉行先至啱。呢一次,保留下來嘅,只有原來嘅公司名稱,與及高佬文同我兩個嘅「拍檔」關係。我地接受當初決定做呢行,係一個草率並且錯誤嘅選擇,於是我地決定將公司嘅業務徹底改變,離開了IT,進入了一行高佬文和我都全無丁點經驗的行業重新開始。當周圍嘅人都批死,我哋兩個經驗全無嘅黃毛小子做呢一行係必死無疑嘅時候,呢間經過一次翻天覆地咁「轉行」嘅公司仔,卻居然能夠爆冷地生存下來。

奇蹟,原來真係會響最後關頭出現的。

Click here to add 米梓橋 on your Facebook

2013年5月15日 星期三

Episode Thirteen

時不時都會響報紙上讀到,有些朋友做了些很cool很勁既事,例如追尋了甚麼甚麼夢想,改變了甚麼甚麼世界;又時不時會聽到,有些朋友響事業上做到了點讓人羨慕既成就,爬得很高,也賺了許多錢。當他們被問到,成功既背後到底係怎麼樣既時候,佢地都會話俾你聽,自己點樣去尋夢,點樣努力,點樣刻苦地完成那些很cool既事情。偶然佢地會輕描淡寫地加一句:「我冇靠過屋企的。」

每次我聽到果句「我冇靠過xx」的說話,我總係會覺得有點un耳。

當一個人響一些領域上面做到了點成績出來,當事人曾經有付出過努力,我從來都唔懷疑。只係我相信每個人既成功,背後除咗個人既努力之外,其實總有好多在明在暗都幫過你既人。你既際遇,驟眼睇你可能以為只係偶然,但實際上,背後係有無數個為你默默付出過既家人、戀人、朋友多年來合力為你拼湊而成。你既成功,佢地功不可抹。當外人將成功既光環套上你既頭上時,你有冇記起那些曾經為你付出過既人?還是你已被四周嘅褒獎所蒙蔽,偏執地認為,今日嘅成功係全因為你自己?

真心的,我並唔仇富。人人都希望有錢,所以有錢並唔係罪過,但有錢既孩子唔懂得感恩卻係問題。我曾經係個食飽無憂米既有錢仔,同樣我亦經歷過忽然變成一窮二白既過程。咁講可能好膚淺,但我這些小小既經驗,卻讓我感受很深刻,明白到即使係同一個人,當分別處於「食飽無憂米」,與及「手停口停」既狀態之中時,自信心既高低,與及追逐夢想既勇氣,可以有幾大既差別。追逐夢想既過程之中,你可能的確冇向身邊既人伸手拎過一分一毫,但她們對你一直不離不棄,日積月累地所賦予俾你既自信心,與及千方百計讓你可以擁有那種「無後顧之憂」既感覺,遠比她們用「真金白銀」去支持你做你想做既事,來得珍貴千萬倍。

每一個成功既背後,不論大小,總是由許多錯綜複雜既人和事編織而成。人生裡面能夠遇到那些人那些事,讓你有機會做自己想做既事,那就已經是很大的運氣了。

要懂得感恩,運氣才會持久。

*****

新既一年,香港經濟持續轉壞。社會上傳出有某種呼吸道疾病好厲害,會死人的。街上開始出現越黎越多帶上口罩既人,電視既新聞,播放住大陸某某廠房內,工人邊開工,邊煲醋既畫面。

經濟疲弱,加上Charles和德哥都離開了,公司只剩下我一個人,「勢孤力弱」,要meet quota,真係談何容易。

果一晚,Charles約咗我到酒吧飲酒,話有嘢想搵我傾。

我到酒吧既時候,Charles已經老早響度等我。我除低面上既口罩:「嗨!咩料呀?」

「到咗拿?」Charles好似精神麻麻地:「呢排咩環境呀?」

「妖,可以咩環境吖。」我苦笑:「你又唔響度,德哥又唔響度,冇人射單俾我救命,個市仲要咁淡,梗係又咬老底啦。連續兩個月都係咁啦陰功…俾阿頭捽到皮都甩呀。」

「咁大鑊?」Charles嘆氣說:「睇怕短期内都好難有轉機喎。」

「係呀,都唔知仲要咬多幾內老底。」我無奈地說:「有啲風話,上面啲老細話睇多兩個月喎。情况再冇改善,就要開始cut人啦。怕且到時都冇運行㗎啦。唔好講啲衰嘢,搵我出嚟咩事?」

「係咁嘅。」Charles喝了一口啤酒:「我返咗屋企幫手之後,認真睇過間廠,唉,好唔掂呀。唔認真搞搞佢,過幾年亭執都似。」

「下?咩咁唔掂呀?」我好奇。

「成間廠,low tech 到我都唔敢相信。」Charles講到有點勞氣:「乜叉都係人手,完全冇system可言,搞到啲order全部甩甩漏漏,浄係因為啲甩漏嘢,搞到要賠錢俾客,都已經食曬所有利潤。所以我想好好地幫間廠,做一次『現代化』既工程,搵人幫佢寫番套system,買番多幾件IT設備,總之,成間廠要upgrade啦。我記得你之前做過IT設備公司,我想睇吓你有冇人介紹之嘛。」

「你呢單嘢,唔平架喎…閒閒地幾十萬落樓喎。」我說:「你有冇預夠budget架?」

「我就係知道貴,所以先嚟問你有冇平既介紹囉…」Charles說:「例如會唔會有啲新入行又信得過既公司,肯平做?」

新入行?信得過?

我忽然醒起,剛回流香港,仲未搵工做既「天才兒童」高佬文。如果佢肯做呢單project,加埋我以前響舊公司識落果班兄弟肯杖義freelance幫我手,Charles心目中果間「新入行」又「信得過」既公司,可唔可以係屬於我既呢?

「等等...」我嘗試盡力整頓我嘅思緒:「Charles,如果我話你聽,我有一個班底可以幫你完成呢個project,而我會負責幫你co-ordinate晒成件事,你會唔會考慮?」

「你認真㗎?」Charles打了個突。

「認真的。」我說。

「你打算自己做生意?」Charles問。

「暫時都唔敢講。」我坦白地說:「但係如果真係接你呢單job做,我會辭咗依家份工,全職去做的。」

「你俾幾日時間我。」我吸了口大氣:「等我安排一下,到時我再嚟搵你,睇下有冇機會成事,OK?」

從酒吧返到屋企,我心裡有一種不能形容嘅興奮感覺。直覺話我知,呢一次,係會成事的。

我漏夜打電話俾高佬文,簡略同佢提起有關剛才Charles呢個project,與及一齊做生意嘅可能性。高佬文還未聽我講完整個故事就回答:「好吖,搞生意咁過癮梗係預埋我。細節出嚟再傾。」

真的,從冇諗過會如此順利。第二朝一早,我連忙打電話俾以前舊公司嘅兄弟,問佢地有冇時間做freelance。果陣時,外面個市靜過鬼,班engine舊同事查實都冇咩job出。佢地忽然聽到話有秘撈賺,當然有興趣接。

一切似乎都好順利,對於今次「創業」嘅可能性,我嘅感覺亦變得越來越實在。

但我知道,我仲需要一個人嘅支持,呢件事我先能夠放心去做。

*****

剛剛過去嘅十一月,心穎同我才剛慶祝過拍拖十週年。以我地仲只係廿幾歲嘅年紀,我哋居然已經一齊足足十年,我覺得簡直係匪夷所思。

近呢大半年,有關結婚嘅計劃,我哋討論得越來越多。我亦好努力咁響度儲錢,諗住過多兩年,就可以儲夠錢娶心穎過門。呢個兩年嘅時間表,其實都算係心穎同我嘅共識。

忽然跑出嚟嘅創業計劃,我心裡好清楚,佢會徹底搞亂我地之前所有有關結婚嘅部署。創業代表我要辭掉工作,響創業初期會零收入,原先我儲落本來諗住用嚟結婚嘅錢,會需要拎出嚟擺落檔生意度,而且做生意有風險,好可能最終會失敗收場。如果我響呢個時候選擇創業嘅話,變相等於宣報之前plan落既結婚計劃需要擱置。

心穎同我一齊十年了。一個女孩子願意響你身上花上十年青春,現在你忽然話要創業做生意,又唔知要再躭誤呢個女仔多幾多年了。我覺得,我如果真係咁做,其實好自私。果一晚同Charles商量完之後嘅興奮,好快就被我對心穎嘅歉疚所掩蓋。

果一晚,我約左心穎響佢樓下嘅公園仔,將呢幾曰屈響我心裡面嘅呢件事,一五一十地講俾佢聽。

心穎聽完之後,沉默咗好一陣子。

我自覺慚愧,心諗,如果心穎真係唔想我做呢件事嘅話,咁我就放棄吧。

「橋,你想做生意,係認真的嗎?」心穎拖著我的手問。

「嗯。」我點了點頭:「不過如果你唔想嘅話...我可以放棄,冇問題的。」

「橋,如果你真係想去做嘅話...」心穎深呼吸了口氣:「去做吧。唔駛擔心我的。」

「心穎,我真係可以唔做的...」我隱約見到心穎眼眶裡面好像有點淚水。心穎平日很少流眼淚的,當我望見這個樣子既佢,我心裡面那份内疚嘅感覺,好重好重。

「如果因為我而要你放棄呢次機會,我一定會好內疚,而我知道你亦一定會好唔開心的。」

「而你話俾我聽,呢件事你會做得到,我就相信你會做得到。」

「我只想我身邊最親嘅人,能夠每日都開開心心咁過。至於其他嘅事,其實都唔重要了。」

我望住眼前嘅呢個女孩子,呢個響過去十年,一直對我不離不棄嘅人 。我心裡面除了果份超沉重既歉疚感覺外,還清楚地聽到一把堅定嘅聲音:「米梓橋,你一定要讓呢個女孩子,往後嘅日子過得好。幸。福。」

2013年5月14日 星期二

Episode Twelve

返呢份Sales工既第一日,我記得阿頭曾經同我講:「我地既Sales Team裡面係唔容許有弱者的。」

果陣,我其實當阿頭響道發噏瘋的,反正好多middle management都喜歡講到自己懶係勁咁,我都冇刻意留心佢所講既呢啲說話。我心諗:弱者嘛…咩叫做弱者先?係咪做唔到數就叫做弱者?Sales呢行,查實都唔駛你開口話「容許」定「唔容許」架啦,搵唔到食既Sales,自動自覺就會走,邊駛你趕架?

我當時的確係咁諗。不過「Sales搵唔到食會自動走人」呢個我認為straight forward到不得了既結論,響我做完兩年Sales之後,體會就有啲唔同啦。係,正常情況的確係咁既,但Sales搵唔到食,好多時候其實係因為個大市唔掂。除咗果班拎住大客既老鬼外,其實全行都冇啖好食。咁即是話,Sales響A公司搵唔到食,其實佢心知肚明,即使佢走去B公司、C公司度撈,同樣係唔會搵到食既。而且大市差既時候,B、C、D、E、F公司,根本都唔會請人,於是乎,Sales即使響A公司搵唔到食,個個月局住咬老底都好,只要佢面皮夠厚,佢必定會賴死響度唔走的,因為佢知道出面根本係冇更好既option。

至於咩叫做「弱者」,我一直以為阿頭所指既,係「做唔夠數」既銷售人員,但原來,弱者原來仲可以有其他解釋的。

*****

捽數會之後,我同Charles匿咗去office既後樓梯打電話俾德哥,我地實在太想知發生咩事。

原來,事情係咁既。

Charles射咗張單俾德哥之後,德哥仲差一張單先meet到quota。原來前日阿頭召咗德哥入房,同佢講,佢已經有兩個月唔到數,如果今個月都再meet唔到數,咁就麻煩佢執包袱走人啦。德哥屋企有大有細,阿頭咁樣同佢講,佢當堂嚇到腳都軟埋。

老實講,跟咗呢個阿頭咁耐,一向都知佢份人,最鍾意講埋啲懶係霸氣既說話黎拋人。呢亭甚麼「再唔到數就好自為之」之類既「標準台詞」,Charles同我查實都唔知聽過幾多次,次次都係「虛應」咗就算數。不過德哥份人老實,阿頭咁樣嚇一嚇佢,就真係拋到佢囉。

聖誕假期前夕,德哥知道客人會響呢個時候向佢落單既機會接近零,於是佢做咗一件,愚蠢到無可再愚蠢既事。

據德哥自己講,當其時佢有幾個「煲緊」既客仔,當中有一間公司,話得事果個係個中年既婦人,同德哥都幾好傾的。德哥話,中年婦人果間公司其實同佢傾好曬啲terms,準備開單。不過大概因為長假將至,個個都holiday mood,開單既嘢,放完假先算啦。

德哥當然唔係咁諗,佢一心諗住要響「捽數會」之前close到呢單deal,等佢夠數meet quota,先可以避免唔駛執包袱。佢見果個中年婦人好似都可以有商有量咁,於是就去搵呢個婦人,求佢可唔可以早少少俾佢close咗單deal去meet數,幫佢過到呢關。

德哥份人,可能真係老實得滯啦。佢居然完完本本咁同呢個婦人講出自己做Sales既苦況,仲同人地講埋自己屋會有大有細等佢養,唔可以冇咗份工芸芸。中年婦人同德哥傾既時候,表現得好同情阿德哥既苦況,仲話會盡量說服老闆俾佢響假期前開埋張單。德哥以為冇死啦,今次遇著個貴人肯幫自己,呢次應該可以順利過關的。點知,呢個中年婦人不單只冇幫阿德哥手,說服佢老闆快啲俾錢開單不特止,仲特登打電話嚟我地公司投訴,話阿德哥好唔專業,響佢面前扮死狗,又生又死又冇錢開飯又乜又物,講到尾都係要「逼」佢地快啲簽單。

呢個投訴,話咁快就傳咗去阿頭果度。阿頭同德哥講:「我地既Sales Team係唔容許有弱者既。你自己做唔到數,就去人地公司度扮死狗搏同情,仲要響客人面前數落自己既公司,咁樣係嚴重影響公司既形象…」

meet唔到quota,公司或者都仲未會即時郁你。但影響「公司形象」嘛…或者正確啲講,你咁樣響外人面前講你份工有幾難哽,等於變相插你阿頭,阿頭覺得丟假,佢點會仲肯俾你留響度?

對於德哥被炒鱿,我心裏面其實係有一點内疚。當日德哥差兩張單就meet到quota。Charles射左一張俾佢,德哥向我求救嘅時候,我卻以「今個月連我自己都唔夠單」為理由推咗佢。我唔夠單meet quota的確係真,但係一張半張單,響果一刻對我嚟講係咪真係咁重要?如果我肯射張單俾佢,佢大概就唔會去求果個中年婦,佢份工,應該仲保得住。

「唔關你事既。」Charles拍了拍我膊頭:「邊個知道會變成咁?」

「得啦。」我點了點頭:「講開又講,幾時last day?」

「過埋聖誕,返埋跟住個禮拜…」Charles說:「除夕就byebye啦。新既一年,剩低你一個啦。」

「你條衰仔冇義氣,話走就走!」我說:「你仲未話我知,跟住去邊喎。」

「見同你熟先講,我返屋企幫手。」Charles講得鬼鬼祟祟:「我屋企做玩具嘅,有間廠仔响上面,我阿爸老啦,佢又唔想做,但又唔捨得賣咗佢,於是咪成日都催我返去幫手囉。」

「頂你吖!」我一拳打落Charles嘅手臂上:「你條友仔都呃得我透啦,原來太子爺嚟嘅!你仲成日响我面前扮窮?你回水呀!」

「妖,唔係有心想呃你哋架,你地冇問,我咪冇講囉。」Charles說;「我本來就係唔想返去幫手,先至求其搵份工,塞住我阿爸把口,做落又識咗你哋,又做得幾開心,咪一路咁做落去囉。不過最近捽數捽到越嚟越變態,呢度越做越唔過癮,加上阿爸又發老脾,咪因利成便,辭工返去幫手囉。」

聽罷,我也只能嘆一口大氣:「Charles,你係太子爺都仲話唔撈嘅話可以返屋企做吖,我唔撈嘅話,都唔知可以去邊!」

Charles辭工,德哥被炒,公司冇晒自己友,新嘅一年,肯定會好難捱。

*****

果個聖誕,仲有另一件事對我影響好深的。

十六歲果年嘅十月,我認識咗心穎之外,同一個禮拜,我響學校嘅球場度黐咗幾場波踢,認識咗幾個到今時今曰仍係最親密嘅死黨。其中一個,叫高佬文。

我一向認為高佬文其實係個天才兒童,讀書果陣,佢基本上係唔駛點讀,輕輕鬆鬆就可以考上全級頭果幾名。後來佢考咗入當地最堅果間大學讀電腦,當然又係以全級頭果幾名畢業。高材生同我呢亭二流大學生相比,事業嘅起步自然有好大嘅分別。當我還在觀塘擔擔抬抬嘅時候,高佬文就已經被全球其中一間最把炮嘅科技公司聘請咗,過住高薪厚簶嘅打工仔生活。

當我以為呢個天才兒童會一直留響北美過呢種高級打工仔嘅生活時,呢個聖誕,佢卻忽然出現響我面前。

「高佬文?搞咩呀?點解你會響呢度嘅?」我問。

「好悶呀!我頂唔順果邊啲生活啦!」高佬文說得有點聲嘶力竭:「我唔想再幫佢地打工啦,真係就快悶瓜我啦!我今次係回流返嚟香港長住!」

天才嘅諗嘢方法,大概從來都同我呢亭凡夫俗子有好大分別的。據高佬文後來同我講,佢離開北美嘅原因,係因為佢忍受唔到自己要俾一班比佢蠢十倍嘅鬼佬head住喎。然而這是否過於衝動,那就只有當事人先知道了。不過佢當日呢個決定,卻原來改變咗我住後十年嘅人生。

2013年5月13日 星期一

Episode Eleven

Sales Team 係一個好特別既「組織」。同一team既同事,既係工作夥伴,但同時亦都係鬥到你死我活既競爭對手。響裡面,同事之間既關係,好多時都好微妙。

做Sales,有時好講運氣既。好運既時候,啲生意係會自動自覺送上嚟俾你,你有時甚至會應接不下。但唔好運既時候,任憑你幾努力,甚至不斷cold call不停掃樓,你就硬係冇辦法搶到一單生意返嚟。有啲管理Sales Team既Management,成日話只要你「勤力」,你係一定會做到數的。老實講,我覺得呢個係我響商業社生生存多年,聽過其中一個最荒謬既大話。事實上,有無數非常勤力既Sales,係不斷meet唔到quota,最終無奈離開呢一行的。

「勤力」大概不可能為Sales帶來成功,但有一樣嘢,我認為一定冇錯,就係交多幾個朋友。Sales Team裡面,大家其實都知道,今日我條數好賺錢多,下個月運氣一轉,我就可能霉到要咬老底。咬一個半個月老底,慳慳地都還可以勉強捱得過去,但連續幾個月唔到quota,你個飯碗,就唔穩陣了。所以sales之間,有時都要守望相助一下。你今個月仲差一張半張單先夠quota交差?ok,今個月我運氣好,有單剩,咁我就射住張單俾你今個月過關先啦。張單表面上條入咗你數,我同你背後啲錢點拆,私底下慢慢計啦。總之,俾你今個月過咗骨先算。

果陣,Charles同我,經常都互相「射單」。今日你救我一次,下個月可能又輪到我救番你。大家盡量「幫幫手」,keep住齊齊meet quota,彼此間既「友誼」,亦都係咁樣慢慢培養出嚟。

果陣時,跟我同Charles一齊常常「守望相助」既「盟友」,仲有一個叫做「德哥」。德哥年幾比我大上差不多五年,屋企裡面有一對仔女正在讀小學,仲有一個長期病患既媽媽要照顧,可想而知,家庭負擔其實幾重的。

德哥係個典型既「勤力型」Sales,Cold Call、掃樓,佢個個月都會做。任何一個既機會,佢都一定唔會放過,落足力去follow每一個lead。但係佢啲數,其實都係一般啦,總係浮浮沉沉。偶然一個月會做得唔錯,但係到下個月,可能又要靠Charles同我射佢一、兩張單嚟吊住條命。

好多人話,Sales係一行多勞多得既行業。我對呢個講法,其實幾保留。事實上,同社會上好多情況都好相似,Sales其實係一行「先來者著數」既行業,至於果啲「後來者」,即使付出幾多努力,都好難追上「前人」既成績。點解咁講?以我地做corporate sales為例,香港其實係一個唔係好大既城市。縱使商業機構眾多,但真正能夠長期俾到生意你既公司,其實寥寥可數。能夠有本事企得穩唔俾人炒既Sales,通常手上必定會有三兩個剛才所講既大客,定期為你落單。就係呢啲咁stable既單,令到呢班Sales能夠期期都到數,每個月都穩賺理想既佣金收入。

問題係,呢班Sales揸住呢啲客,除非逼不得已,否則佢地係一定唔會將呢啲客仔放出嚟既。新入行既Sales,由於根本冇機會可以掂到呢類客人,佢地就只可以向市場上面,仲未有人「mark」咗既公司埋手,而呢啲公司,通常都唔會係咩大機構,就算今個月俾到些少生意你,下次再有機會俾生意你做,可能已經係三、五年後既事了。新入行既Sales,欠缺大客做後盾,作為穩定收入既來源,面對每個月俾人無情地去捽數,自然唔容易捱。後來我發現好多公司既Sales Team其實都有類似既生態出現:幾個老鬼top sales,揸住幾個超級大客響手上,收入既理想又穩定。呢幾個老鬼sales因為上咗神檯,查實唔駛點做,勤力就一定冇佢地份,但每個月收入最高既員工,佢地卻一定入圍。由於收入理想,佢地閒閒地會響公司做番十年八載,好穩定的。但另一方面,同一條Sales Team裡面,又必定會有一班新嚟既年輕Sales。佢地每日都努力搵客,但因為大客永遠唔會到佢地手既關係,佢地搵來搵去,都只係啲魚毛般既客仔。偶然可能俾佢地撞到一單半單比較似樣既生意,但絕大部份既時候,佢地都好似德哥一樣,浮浮沉沉,徘徊於到數與唔到數之間。呢班新入行既Sales,因為成日meet唔到quota,於是時不時就會「被逼」轉工,由一個行家,轉去另一個行家,又再轉去另一個行家…直至有一日,轉無可轉,最後唯有轉行,從此脫離Sales呢一行。坦白講,其實幾悲哀的。

*****

講遠咗了。

初初做Sales頭半年,除咗頭一個月要咬老底之外,收入都係穩步上揚的。我當時還以為,我既事業,應該真係出現咗啲曙光了。但係半年之後,科網既熱潮開始續逐散去,外圍經濟又唔掂,再加埋阿董生話,八萬五忽然「唔存在」了。香港既經濟環境,其實係越黎越麻麻的。

經濟唔好,Sales既收入自然差。企業要cut spending,IT項目既開支必然係首當其衝。頭半年既「風光」日子,好快就煙消雲散,咬老底既月份,亦時不時就出現。如果唔係靠住Charles同德哥,一齊「互相扶持」,大家份工,可能真係保唔住的。

「橋,月尾有冇單剩呀?今個月差兩張先夠quota呀…」食飯既時候,德哥苦惱地說:「上個月我已經meet唔到,阿頭話今個月再meet唔到,真係炒魷架啦。」

「Sorry呀德哥,我自己都唔夠單。」我搖了搖頭:「今個月我都咬老底咋,幫你唔到。」

「哈哈,我成個月得一張單。」Charles苦笑:「一張單同零張單,都一樣係俾阿頭『小』到上天花架啦,冇分別嘅。我射我果張單俾你啦德哥。」

「你講真?」德哥有點顎然:「Charles,咁點得呀?唔好意思架喎。大家一場兄弟,你自己都唔夠數,我唔想拎你呢啲著數呀,我過意唔去架。」

「客咩氣丫德哥!」Charles笑了笑:「下個禮拜聖誕啦。年尾流流邊有客會同你開單吖。你屋企負擔重呀,你唔食你啲細路都要食啦。我單身寡仔,我冇所謂呀。」

「同埋呢…」Charles飲了一口咖啡:「我查實諗住遞信唔撈了。」

其實也難怪,市道唔好,做Sales越嚟越搵唔到食,這樣既環境,自然會令一部份既行內人選擇離開。德哥同我都追問Charles劈炮唔撈,跟住有乜打算。Charles總係答得支支吾吾。不過果陣德哥同我,都正正為咗當月條數煩惱不已,所以都無暇向Charles追問了。

*****

果年既聖誕節,係咁多年嚟其中一個我過得最唔安落既聖誕。

Charles遞信辭職,循例要響公司坐多兩個禮拜至可以走人。聖誕長假期前既「捽數」大會,阿頭響知道Charles辭職了,就連數也懶得向佢捽。之前預計,因為「零開單」而被阿頭「小到上天花」的場面,自然亦冇出現。

這天既捽數會開了近十分鐘,我還未見到德哥蹤影。德哥份人好少遲到的,我推了一推坐響我隔離既Charles:「德哥去咗邊?」

Charles聳了聳肩。

時間一分一秒地過去,除了已經遞咗辭職信既Charles外,我們每一個Sales,都輪流被阿頭「捽」了一round。捽數通常都只係鬧你冇Q用,又唔俾心機搵新客,再兇下你,如果下個月再唔到數就亭炒諸如此類。老實講,呢種"motivation"既效果,好有限既遮,一個唔留神,仲可能會有反效果。即使到咗今時今日,我都依然覺得,要用到又鬧又嚇既手段去管理下屬既老細,通常都係冇乜料到的。

當阿頭捽完數之後,佢忽然話有事宣佈。

「今日想同大家講,嚟緊將會有兩個同事離開我地。第一個係Charles,早兩日佢同我辭咗職嘞,呢個消息,我諗你地可能知得仲早過我。一場同事,我響度祝Charles前程錦繡吧。」

「第二個,係德哥。」阿頭說話時停了一停:「發生咗某啲事情,公司決定同德哥即時終止僱傭關係,所以大家唔會再見到德哥返工了。」

我跟Charles互相望了一眼,心諗:「發生咩事?」

德哥今個月唔夠數,呢樣嘢Charles同我一早就知。但係做唔夠quota,都唔應該係乜嘢大件事到,要即炒下話?今朝返嚟既時候,德哥個位啲雜物仲放晒響度,好明顯德哥自己係唔expect佢會響一個咁既狀況底下被人炒魷的。

搞咩呀大佬?

Click here to add 米梓橋 on your Facebook

2013年5月12日 星期日

Episode Ten

我覺得對一個男孩子嚟講,爸爸其實係一個好重要嘅Figure。

爸爸係小孩子嘅模仿對象,係小孩子嘅偶象,響兒子嘅心目中,爸爸無所不能。

正因為響男孩子嘅心目中,爸爸所代表嘅實在太多,當男孩子覺得被爸爸背叛,感受卻特別深刻。

*****
自從大學畢業當日,五姨向我講出有關老豆嘅事之後,我足足有一年幾唔肯同老豆講嘢。

起初,的確係因為好嬲好嬲,覺得老豆好對屋企唔住,所以完全唔肯同佢有任何交流。但係日子耐咗,果種憤怒嘅感覺其實已經續逐消退,大家依然唔肯講嘢,好大程度上,係欠缺一些「打破僵局」嘅勇氣。

同老豆呢年幾嘅「冷戰」經驗,令我諗起一啲好耐冇揾,想搵但又硬係的唔起心肝主動去搵番嘅老朋友。呢啲朋友,響未「失散」之前,大家可能曾經係推心置腹,互相扶持嘅好兄弟。唔知因為咩原因,某年某月某日開始,大家都冇再去搵對方,只係偶然響朋友嘅口中,又或者近年晌Facebook裏面,得知道對方嘅近況。你話你忘記咗呢啲朋友咩?又唔係喎,但係每次諗起呢啲朋友,心諗咁耐冇見不如約出嚟敍下舊,你又總係會為自己製造無限個藉口:自己好忙?過埋呢排先再搵人哋?唉,人哋咁忙,都係咪搞住人?你又咁諗,人哋又咁諗,於是大家繼續唔搵唔見唔瞅唔睬,但其實大家都可能只係等待緊對方嘅一個來電。

好老土,同心穎一齊响ICU果晚之後,我忽然覺得,同老豆嘅關係,唔應該再咁樣落去。兩仔爺關係解凍嘅過程,亦絕對冇咩感人肺腑賺人熱淚嘅過程。只係有一晚响屋企,當我見到老豆時,說了一聲:「嗨!」,就係咁簡單。

男人其實都係咁,好多嘢,無謂解釋了。一切都在心中就算。

後來有一晚,阿媽約咗舊朋友食飯,屋企得番我哋兩仔爺。

我落樓下燒味舖買咗兩盒叉雞飯,開咗兩罐啤酒,就同老豆開起餐來了。我諗一諗,自我十六歳俾佢送咗出國讀書之後,好似一直都冇試過同老豆單獨食餐飯了。

我吞咗一嚿又一嚿叉燒,最後還是忍唔住問咗一個,我一直都好想知嘅問題:「到底老豆當年點解會出軌,點解會背叛咗家庭?」

「仔,講乜叉都係嘥氣嘅,講到尾其實都係命。」

我聽到之後心裏一陣火光,心諗:「我頂你,你自己衰咗就認x咗佢把啦,你夠膽死無賴到賴自己條命?你冇嘢呀?」

「果陣文革吖嘛,你老豆我為咗逃避俾人批鬥,搏咗條命都要仆落嚟香港,落到嚟香港,冇耐就識咗你阿媽,跟住之後仲結埋婚添。」老豆邊飲啤酒邊講。

「挑,呢啲我早就知啦老豆。」我說:「我係想知,你點解要對阿媽唔住呀。」

「走佬落香港之前,我都有拍拖有啲女朋友吖嘛。」老豆又飲多兩啖啤酒:「果陣諗住偷渡去香港,預咗自己分分鐘連命都冇,咁梗係同條女分手啦。」

「點知居然真係俾我有命落到嚟,我咪以為,可以徹徹底底咁過新生活囉。以前響上面嘅女朋友,諗住呢世都冇機會再見架啦。咁我又識咗你阿媽,你阿媽又鬼咁好,我本來以為一切都會繼續順順利利落去的。」

聽到呢道,我已經多少估到故事嘅背後係點樣了。

「果年,你阿媽大肚陀住你,有一日突然有個女人走上嚟公司揾我,我一望,原來係以前响上面識落嘅女朋友。人哋又係搏咗條命偷渡落嚟,仲特登為咗嚟搵我,咁你想我點?」

「要講邊個啱邊個錯,咁梗係我錯啦,肯定係我對你阿媽唔住的。但係果陣人哋山場水遠落到嚟,我覺得唔可以唔理人哋吖嘛。後生,係會唔識諗㗎啦。我以為我咁樣叫做"負責任"吖嘛,以為咁樣做係別無選擇,我唔理佢佢會好淒涼,結果呢?三個人都痛苦,仲要一痛痛足幾十年。」

我聽完,覺得有點「說不出話來」嘅感覺。老實講,故事其實好簡單的:基本上係新歡同舊愛,響冇計劃過嘅情況之下忽然一齊出現,做男人果個醒到以為兩個女人佢都要孭起,於是冇作出任何選擇,兩個都要晒唔肯放棄。

我響度諗,假如換轉係我,遇上咁嘅情況,我又會點樣處理?

不忠固然唔值得原諒,但我覺得老豆犯上最大嘅錯誤,其實係過份自信。一個人要令一個女人,幸幸福福地去過一生,已經絶對唔簡單唔容易,我完全理解唔到,佢憑乜嘢可以相信自己,有咁嘅本事可以同時令兩個女人都幸福快樂?我或者對呢件事充滿偏見,睇法並唔中肯,但倘若當日老豆如果能夠堅持一啲,信守婚姻嘅諾言,佢果位前女友可能響香港已經搵到另一個好男人,過住正常嘅婚姻生活,唔需要唔見得光,孭住「二奶」嘅污名二十年;而我阿媽,心裡面亦唔會有呢一根刺,一直刺痛住佢,直到永遠。

一切都只因為,作為男人嘅太自負了。結果將三個人嘅人生,全都搞垮了。

老豆係屬於獅子山下奮鬥成功嘅一代人,也許當時嘅環境,也真係造就咗太多成功案例,大家都不知不覺地高估咗自己,而這個高估自己嘅代價,卻由三個人一起承受。呢件事,太死蠢了。

老豆歸咎呢個「悲劇」發生,係命運嘅驅使,我唔敢百份百予以否認,但我則認為,呢單嘢其實主要係「自大」所惹嘅禍。當一個人太過高估自已,以為自己乜都有本事處理嘅時候,佢哋自然會不自覺地將好多有潛在麻煩嘅事情攬上身,誤以為有本事完滿解決呢啲嘢嘅人,捨我其誰?結果呢?解決不成還連累他人。這不是因為命運使然,而係因為人性嘅弱點所致。

我冇遺傳到老豆果份超強嘅自信心,也從來唔敢高估自己。一個人晌事業同工作上,要遇上多麼複雜嘅事,也許自已並冇能力控制。但係響家庭、感情上,呢啲自己還有多一點把握去控制嘅事情上面,像我這種凡夫俗子,我覺得還是盡量保持「有咁簡單得咁簡單」,來得安全化算。

老豆留俾我嘅教訓係,於感情事上,即使你只係犯一次錯,你可能一世都要承受。

小心。

*****

轉行做了Sales之後,除咗頭一個月要咬老底之外,收入其實算係慢慢咁好起來。人有時係好膚淺的,搵錢多咗,自信心也隨之續漸增加。縱使收入並唔太穩定,但面對心穎嘅親朋戚友時,總算冇以前咁自卑了。

然而,我哋兩個差不多拍咗九年拖,都「居然」仲未拉埋,依然成為一眾食飽飯冇嘢做嘅三姑六婆,茶餘飯後嘅最佳話題。四週圍俾我地嘅壓力,亦越嚟越大。冇錯,我哋拍拖嘅時間的確係長,但係大家响向我哋兩個起勢咁催婚嘅同時,有冇留意到,我哋其實仲好後生?果年,我還只不過廿五歳。

咁多年嚟,心穎都係我唯一嘅女朋友,我亦認為呢個女孩子我係必定要娶的。但係一個屋企剛剛破產冇耐,大學畢業還不過兩年左右,仲要岩岩轉咗行嘅廿五歲後生仔,你expect佢可以有幾多基礎去應付結婚嘅開資?OK,我知道呢幾年心穎都儲到啲錢,最近仲升咗職加咗人工添,但係我總唔能夠,結婚嘅開資要由女朋友負責掛?男人總有些少無謂嘅尊嚴需要捍衛的。到時班口多多嘅三姑六婆,又會晌度通街唱,話心穎要貼埋大床咁嫁過嚟了。

噪音太多,加上當時我嘅事業又稍為有丁點兒好轉,有關「結婚」計劃嘅初型,心穎同我亦開始晌閒話家常嘅時段裏面有所討論。當時我哋估計,一切如果順順利利的話,俾我再儲多兩、三年錢嘅話,我估,我應該都勉強有能力,「體面」地娶心穎過門的。

當然,個condition係,要一切「順順利利」,才能成事。

然而際遇嘅嘢,總係變幻無常的。「一切順利」,其實係相當奢侈。

Episode Nine

我估,世界上其實係冇人喜歡長大的。

長大代表住承擔更多既責任,面對更殘酷既現實。我地縱使知道我地需要長大,但我地絕大部份既時間,都在拒絕長大。

然而一個男孩子由最初拒絕長大,到後來努力逼自己快點成長,背後總要有一些原因去推動。人到中年之後,見既事情越黎越多,親眼見證過既婚姻破裂過案,亦實在唔少。當中既一啲個案,正正係作為老公既一直唔願長大,做太太既於是千方百計咁希望老公成長起來。太太越係心急,說話就越不自覺地刺中老公既痛處。當果個傷口被最親既人不慎再刺一刀,婚姻關係從此就再冇辦法修復到像從前一樣。

大部份既男人,都係受軟唔受硬的。一個唔願長大既大細路,當感受到身後既女孩子對自己既不離不棄,再死蠢既,都總應該有一點點醒悟的。

*****

仲記唔記得,人生第一次諗轉工,背後係乜嘢原因驅使你?

心穎果晚既說話,當然係一個「導火線」,讓我覺得,無論如何我都一定要向前行。當然,諗得轉工當然係期望能搵到更多既錢,但決定離開既最大理由,係覺得自己唔可以無了期地停留響一個不斷磨滅自己鬥志同自信心既環境裏面。如果再唔變,我終有一日,係會被逼放開我拖住心穎既一雙手,將呢個同我一齊八年既女朋友,拱手相讓俾Marcus。而呢一日,可能距離現在並唔係好遠。

第一份工,我做咗差不多十八個月。整體既經驗,雖然係麻麻地,但係走既時候,我其實係好唔捨得,同我一team做嘢既果班「兄弟」的。

我拎住十八個月既騎呢工作經驗,再加上一份唔見得人既大學成績,搵工既難度,其實唔見得比十八個月前少。呢段時間,有人搵過我做保險,又有人問過我有冇興趣入行做地產經紀。總之,唔介意我「背景」既工作,幾乎清一色同「銷售」有關。由於我有些少IT背景,於是我就諗,反正都係做sales,咁倒不如做一行我比較熟架啦。就係咁樣,我搵咗一份,響電訊公司裡面既sales工作,負責corporate client。

轉工既時候,有唔少朋友都勸我要諗清楚,做sales係一份三更窮五更富既工作,絕無穩定可言。以當日我既經濟狀況黎講,呢個可能係個相當risky既選擇。動筆簽約之前,我個心其實仍是十五十六。

「仲未諗掂聽日簽唔簽?」食飯既時候,心穎見我冇乜胃口,大概也估到我正在為乜心情忐忑。

「始終未做過孭quota既工,萬一做唔到數…」我望住我那份平時最愛既大家樂牛扒餐,也好像吃不下去:「要咬老底既話,唔夠生活呀。」

「其實份工岩唔岩你,我都唔敢講,始終都係要做過先知。」心穎扁了扁咀:「不過如果只係因為擔心底薪唔夠生活既話,就唔好諗太多啦。我份工仲好穩定,平時都夠洗的,真係有需要既時候,我啲積蓄應該都可以幫到手既。」

「唔得!」我反應也蠻大的:「我唔駛女人錢架!點可以要你幫架!」

「橋,咪咁啦。」心穎見到我反應咁大,都嚇咗一跳:「我地一齊咁耐,唔好咁都要同我計啦好嗎?邊有得分咁清話邊個幫邊個架?」

我果陣雖然環境麻麻,但對於洗女朋友錢,我還是非常避忌的。我大概覺得,呢樣係男人既尊嚴問題。但話雖如此,心穎同我講到咁,我又真係諗唔到理由唔去簽約返工搏一搏。我總唔能夠話「因為我怕自己萬一做唔到數要咬老底,會令我有需要洗女朋友既錢」,所以我就放棄一個轉行既機會掛?大佬,講出黎都覺得自己冇志氣啦。如果我係心穎,知道男朋友係因為一個咁「懦夫」既理由而放棄份工既話,我諗我真係會轉頭就飛咗你了。

我既Sales生涯,就係如此這樣開始了。

好多人都話,Sales係冇尊嚴嘅工作,客人面前你像條狗,老細捽數果陣又可以對你肆意侮辱。總之做得呢行,「尊嚴」係必須要放埋一邊的。我做Sales果兩年,見到好多人,特別係女孩子,入行唔到幾個月,有啲甚至試用期都未過就急急腳走人,主要都係抵受唔住「欠缺尊嚴」呢樣嘢。人嘅際遇好得意嘅,你以為跟咗一個冇料老細,令你完全學唔到嘢,浪費曬啲時間咩?往後睇返轉頭,你先會發現,原來自己響同佢相處嘅過程裡面,佢都曾經有塞過錢落你袋的。好次對上份工嘅七叔咁,當你受過佢對你每日既無理且近乎人生攻擊嘅肆意踐踏後,做Sales果陣所遇到嘅所謂「冇尊嚴」,就真係唔覺得有咩大不了。

我能夠由一個,每日袋住士巴拿同螺絲批響褲袋,負責擔擔抬抬嘅「藍領」,變回一個著西裝打領帶嘅「白領」,心裡面已經覺得好滿足了。要我做條冇尊嚴嘅狗,我又有乜所謂?

大概係Sales嘅入職要求,較其他行業相對寛鬆一點點,入職之後,我先至發覺同我背景相近嘅同事,原來也為數不少。佢地都係大學畢業,但好多同我一樣,主修咗啲冷門科目,又或者係大學成績唔多見得人的。難聽一啲講,都係一班「次一等」嘅大學畢業生。讀緊書嘅時候,大家或者都唔發覺,「讀得唔好」係會對事業嘅起步有咁大嘅阻力,仲天真到以為,只要畢到業有張沙紙就乜都得。到真正踏入社會,撞過板遇過挫折,先識得後悔點解從前讀書嘅時候唔俾心機啲。

第一日返工,有另一個同我年紀相若,叫做Charles嘅後生仔,同我一齊入職,一齊受訓。都係果句,人嘅際遇往往係意想不到的。當日同Charles熟落起嚟,完全因為大家都去到新環境,咩人都唔識,總要埋堆搵個伴。勢估唔到,Charles日後會成為其中一個改寫我人生既關鍵人物。

*****

心穎爸爸被診斷出有病之後,除咗改變咗心穎嘅生活節奏同安排之外,仲有一樣嘢改變咗:身邊越嚟嚟越多人向我地兩個催婚。

三姑六婆話,我哋如果結婚,會有冲喜嘅作用,對世伯嘅病情有幫助。

倒係世伯份人明白事理:「唔駛理佢哋啦,啲人都傻嘅。係好番嘅點都會好番㗎啦,洗乜信埋啲咁嘅迷信嘢?」

世伯有病之後,還是樂觀積極地面對。我望住心穎同埋佢阿爸,越嚟越覺得,「愛笑」同埋「樂觀」呢亭特質,其實可能係有遺傳的。

三姑六婆嘅可怕之處,係有本事將一件完全冇發生過嘅事,講到繪形繪聲。最初佢地口痕痕向心穎催婚,主要都係因為話要冲喜。後來佢地發覺心穎同我「居然」已經拍咗八年幾拖,佢地就開始對我倆「点解仲唔結婚」作出大量揣測。最common嘅講法係,作為男朋友嘅我「仲未玩夠」,所以將婚期刻意拖延。有時甚至會有人苦口婆心地勸心穎:「你地拍咁耐拖都唔結婚,好容易就會散㗎啦!」我哋聽完呢啲人嘅「勸告」,也只可以胡胡混混耍過就算。只係呢啲說話聽得多,我哋嘅壓力亦隨之而越來越大。

隔咗冇幾耐,醫生提議世伯不如開刀將腫瘤切除,世伯冇考慮太多就決定做手術了。我唔知道,係咪因為世伯响診斷出有病之後,有食過中藥嘅關係,腫瘤切除後,化驗報告嘅結果居然話,個腫瘤變咗做良性。我哋縱然覺得匪夷所思,甚至覺得有点像神跡一樣,但係呢個康復嘅「結果」,確係令心穎同佢嘅家人都鬆咗一口氣。

世伯做完手術之後果日,心穎同埋我一齊去咗醫院嘅ICU探世伯。我哋探世伯嘅時候,化驗結果其實仲未出嚟,但係經過咗一次大手術,心穎同埋屋企人又經過咗好一段食唔安瞓唔樂嘅日子,到最後終於將腫瘤切除,果種「死過番生」嘅感受異常強烈。人生其實冇幾多至親,生命無常,你亦永遠唔會知道,你會響幾時失去佢哋。這些說話我明白好老土,但卻係百份之百嘅現實。

響ICU裏面望住心穎同世伯,我不其然諗起自己嘅老豆。佢同我,足足年半冇講過一句說話了。

到底係,我對佢嘅憎恨真係咁大,還是憎恨已過,但維持住如此嘅關係,原全只因面子過唔去?

Click here to add 米梓橋 on your Facebook

2013年5月9日 星期四

Episode Eight


記者會之後既一個禮拜,唔知點解,我總係嘗試「逃避」著心穎的。

見到心穎既來電,我有時會扮收唔到。當扮收唔到得太多,終於「逼於無奈」要接聽佢既電話時,我則求其敷衍幾句,然後唔係扮忙、就係扮眼瞓,總之盡量拿拿臨收線。

當然唔係心穎做錯咗啲乜嘢事,而係記者會之後,我真係覺得好丟假,好醜。每當心穎打電話嚟,我就不自覺地諗起當日自己果個丟假既樣子。跟住我又忍唔住會胡思亂想,佢啲同事會唔會響心穎背後指指點點…笑佢有個咁廢柴既男朋友。


一個人冇信心既時候,的確可以好恐佈。明明冇人睇你唔起,但你自己又總係響度疑神疑鬼。呢種無謂既猜疑,除咗令到自己冇運行之外,好多時候仲會傷害埋果啲仍然愛錫你既人。唔怪得俗語有芸:乜嘢都可以輸,唯獨信心唔可以輸。


我識有啲朋友,當自己既女朋友俾人追既時候,總係會大發雷霆,又拍檯又爆玻璃。我怕痛,呢亭咁既火爆場面一向都唔岩我style。可能係心穎一直以黎都「識做」,所以我從來都唔需要發啲乜嘢脾氣,去嘗試勉強保住一段關係。事實上,我亦相信女孩子係有權利選擇一個更適會自己既人。如果真係有個咁既人出現,佢要走,你莫非可以唔放佢走?維持一段關係既關鍵,係不斷努力地去推動自己,讓自己成為最適合你另一半既一個人。但係有啲時候,事與願唯,那你就唯有認命吧。


當信心最低殘既時候,我曾經低能到響度諗:「響我仲想逃避心穎既呢段時間裡面,佢有Marcus照顧住,我其實應該冇嘢需要擔心丫。」


一個男人,如果冇志氣到連自己女朋友可能被搶走都覺得冇所謂既話,咁仲會有啲乜嘢可以令佢真係擔心丫。


*****


晚上九點左右,我既手提電話出現心穎既call display。我唔想接,所以刻意冇聽,任由電話繼續響,直至對方掛線為止。


大約五分鐘之後,心穎又打電話來了。我同樣扮聽唔到電話,任由電話不斷響。我自己則獨個兒在大家樂,繼續食那份牛扒餐。


我在大家樂坐咗差不多半個鐘,忽然電話響起,個call display我從來都未見過的,於是我連忙按掣接聽。電話既另一邊,傳黎一把男聲:「你好,請問係咪阿橋?」


「我係呀…你係邊位?」我問。


「我係Marcus,Stephy個同事呀。」Marcus語氣有點急:「係咁既,Stephy頭先響office唔係好舒服頭暈,衣家佢步履都唔係好穩。你方唔方便衣家過黎我地office,送佢返屋企?」


「Marcus,佢有些少血糖低架…」我冇諗太多就跟Marcus說:「麻煩你幫手搵兩塊chocolate俾佢食先,記住千祈唔可以係dark chocolate,佢唔肯食既。」


「好,我去pantry拎俾佢。」Marcus說:「咁你快啲過嚟,你去到office樓下打電話俾我。你電話個call display見到我個冧把嗎?」


「見到。」我說:「我好快到。如果食完朱古力之後都冇好轉既話,你記住call我。」


「OK,陣間見。」說罷Marcus便掛了線。


我跳上的士,飛快從北角去到中環。心諗:「心穎你個衰妹梗係又掛住開工唔食飯啦…由細到大都係咁既,明知自己血糖低唔餓得丫嘛…」


十點左右,我到了心穎既office。Marcus走出來替我開門。


「心穎情況OK嗎?」我問。


「俾咗兩片朱古力佢食,真係好番好多啦。」Marcus微笑:「佢響meeting room休息緊,我帶你入去搵佢丫。」


「Marcus,係心穎叫你call我?」我一邊跟住Marcus朝會議室方向走著,一邊問。


殊不知Marcus忽然停下腳步,並呼了一口大氣:「橋,實情係咁既。Stephy初初見唔舒服既時候,佢自己就已經打電話俾你,不過佢話你收唔到call。後來我見佢面色越黎越差,我話不如我揸車送佢返屋企啦,佢死都話唔駛,佢淨係不斷叫我幫佢搵你過嚟。」


原來我刻意唔聽既果兩個call,係心穎打黎「求救」的。忽然我覺得好內疚。


「呢啲時候,Stephy始終都淨係想你響身邊。」Marcus嘆氣:「前面轉左就係meeting room,你女朋友響裡面。」


我點了點頭。


「我又交番個女朋友俾你啦。」Marcus露出一個苦笑既表情:「我打電話幫你地call的士。」


*****


我見到心穎時,心穎已經吃過朱古力,暈眩既情況已經好轉了。


「你梗係又冇食嘢啦。」我說:「你要識自己照顧自己先得㗎。」


「Sorry 阿橋。」心穎說:「一路掛住做嘢,都唔記得咗自己未食飯。」


Sorry?點解佢要say sorry呢?我心諗,講對唔住果個應該係我先岩。


我拖著心穎既手,好像有點燙:「心穎,你係咪發燒?」


「係呀,有啲感冒。」心穎說:「今朝返工前睇咗醫生啦。求先可能就係空肚食咗佢粒藥,所以頭暈囉。」


知道心穎病咗,我心裡覺得更加內疚。呢個禮拜,我不斷咁「逃避」同佢見面同講嘢,就連佢病咗我都居然唔知,唉,真係唔知自己點做人男朋友。


送到心穎返屋企,已經接近十一點。心穎既屋企人,全部都訓晒了。我同心穎坐響客廳梳化上,我其實好想同佢講一聲「對唔住」,只係呢句簡單既話去到口唇邊,又不自覺地吞返落肚。


「點解…」我問得吞吞吐吐:「Marcus話車你返屋企,你唔俾佢幫你?」


「橋,你記唔記得,十八歲果年果個暑假?」心穎躺在梳化上,合上了眼,聲線非常疲弱。


「嘩,好多年前啦喎…」我說:「印象好模糊吓啦。點解咁問?」


「果個暑假,我同班friend去溜冰受傷,隻腳打咗差不多兩個月石膏…」心穎微笑望著我:「有冇印象?」


「你講返起就梗係記得啦。」我說:「果陣你啲屋企人返晒香港丫嘛,得番你一個響果邊。我仲特登cancel咗我張機票冇返黎香港,留響果邊陪你。我阿媽知道我放暑假都留響多倫多唔返嚟,鬧爆我呀果次。」


「你知嘛,最初同你拍拖果陣,我真係完全冇諗過要同你一齊咁耐架。」心穎說:「果時本來諗住,我哋都係一、兩年貨仔,大家就可能要換畫架啦。」

「嘿嘿,乜你原來咁唔認真架?」我說:「不過唔怪你,我其實最初都係咁諗。」

「後來我受傷,你特登唔返香港留響度,仲日日咁過嚟,由朝到晚咁陪住我。」心穎笑了笑:「就係果陣,忽然覺得,你呢個男仔原來都真係幾好喎。我雖然見你呢個少爺仔幫我煮飯、執頭執尾果陣搞到雞手鴨腳咁,但係望見你每日都響度好落力咁照顧我,我反而覺得,好安心,好安全。我果陣就響度諗,或者,我將來可能真係可以嫁俾你。」

我只係一路聽,沒有作聲。

「自此之後,每次我有乜嘢頭暈身慶,我總係希望你響身邊。」心穎聲線變得更疲弱:「總之知道你響身邊,我個心就會安定落嚟。」

「放心,我喺度。」我拖著心穎的手:「對唔住。」

「橋,我知你諗緊咩。」心穎說:「每個人都一定有低潮嘅時候,冇問題㗎。我知道我男朋友一定捱得到過去嘅。」

「我只係呢兩年,響事業上比你運氣好一啲。」心穎虛弱地說:「你唔駛介意的。」


「嗯。」我點了點頭:「放心,我冇問題既。你唔舒服要早啲休息。」


我正準備離開,心穎卻忽然用力握住我的手。


「橋,如果你放手,我今次可能真係會俾Marcus帶走架啦。但係如果你選擇唔放手既話,我都一定唔會放手的。」


Click here to add 米梓橋 on your Facebook

2013年5月8日 星期三

Episode Seven

好多年之後,響心穎同我既婚禮入面,Marcus係我地其中一位坐上客。

我慶幸響我既生命裡面,曾經出現過Marcus呢個人。我同心穎拍拖既日子裡面,遇過好多形形式式既「情敵」。然而最後可以由「情敵」演變成「朋友」既,就只有Marcus一個。

對我嚟講,Marcus係一個好好既對手,而且係個百份百既君子。一個男人既成長,有時係需要一個強勁既對手響身邊催谷一吓的。如果當日我最終輸咗響佢既手上,我必定會輸得心服口服,然後祝福佢地幸福快樂的。

*****

醫院既報告話,世伯個肝有個腫瘤,是惡性的。

報告出咗之後,心穎既生活節奏,就開始有明顯既改變。外資銀行果份工,心穎當然繼續要返,但工作以外,卻要騰出額外既時間照顧世伯。家事繁忙,工作亦繁重,再加上擔心世伯既病情,情緒長期受壓,心穎既身子也變得越黎越差。

響世伯有病呢大半年,係我見到Marcus身影最密既日子。據心穎後來講番我聽,果段時間因為家事太過繁忙,成日頻頻撲撲,佢響公司既工作跟本係冇能力集中去做,所以犯咗唔少錯。Marcus暗地裡響背後幫佢補咗唔少鑊。偶然我都會見到Marcus揸車送心穎去睇世伯,我果陣就不禁響度諗,原來香港地有架私家車都真係幾重要。

Marcus呢個對手,給予我好大既壓力。壓力既來源,並唔係因為Marcus比我名成利就,有車有樓。講真,以前曾經追求過心穎既男孩子當中,比Marcus來得更富有的,其實大有人在。面對果啲有錢既對手,我反而都冇真正驚過。但係Marcus就有啲唔一樣了。呢位對手既魅力在於,佢從來唔會刻意賣弄自己既事業同成就,佢明知佢既對手「我」,響牌面上即使輸晒俾佢,亦從來唔會刻意踩多兩腳。相反佢選擇響心穎既背後默默地對佢好,讓自己既「分數」一點一滴地累積,然後靜靜地期待心穎有一日會感動起來。

呢種對手,太難纏了。

你好清楚,有呢種人響身後,只要你一不留神稍有鬆懈,佢就可以超越你,甚至徹底地打敗你。

*****

「橋,今日交易廣場果邊要on-site support,要我地派四個engine過去。」七叔一邊在電腦上玩拆炸彈,一邊跟我說:「本來杰仔去既,不過佢今日病咗,你去頂一頂啦。」

「哦…」我應了應七叔:「有啲乜嘢要做架?」

「挑!去到果度人地叫你做乜春你咪做乜春囉!」七叔老沒好氣地說:「好似話佢地今日有個記者會,應該都係要你地去搬搬抬抬,最多都係幫吓手駁吓cable咁既遮。我派得俾你做既嘢,可以有幾難丫?難既你都唔x識做啦!」

七叔硬係鍾意九唔搭八都要串我幾句先安落的,我其實真係唔知道,我到底有啲乜嘢得罪過佢。

七叔將Job Sheet交俾我,我一望:「咦?呢間咪係心穎做果間公司?乜原來係我地既客嚟架?」

知道今日要去心穎公司出job,唔知點解,心裡面總係覺得有啲唔舒服。

我地一行四個engine,大約兩點鍾就到達咗客人響交易廣場裡面既辦工室。記者會將會響四點半舉行,大概都係甚麼業績發佈會之類吧。一如七叔所講,我們到這裡既工作,都係不外乎擔擔抬抬,並幫佢地駁好晒啲線,預備一陣間既記者會。

大約三點左右,有個疑似係高層既中年男人走過來,將一部notebook交到我手:「我陣間會用呢部嘢做presentation,幫我駁好啲線佢,同埋make sure佢上到網。」

我沒頭沒腦地「哦」了一聲,便接收了那部notebook了。

我小心將那部notebook放在咪前既講台上,並插入Lan cable:「喂,兄弟,過一過嚟幫一幫手,部notebook個lan port好似唔係好妥喎…上唔到網喎!」

「咦,係喎…」跟我一起來既阿仁連忙檢查那部電腦:「你睇吓,機上面個Lan Port鬆鬆地呀,接觸個位唔係好穩呀。你睇盞綠色燈,又著又熄咁。」

「係喎。部機咁樣唔掂喎。」我說:「我去搵番頭先果個老細,睇吓可唔可以將佢一陣間用嚟presentation既data,copy去另一部機果道啦。用呢部既話,press con中途講講吓斷咗線就大檸樂了。」

「你知道要抄邊啲data咩?」阿仁問。

「梗係唔知啦…」我說:「就算知,我都要問準咗佢先可以開佢啲file啦,要搵佢返嚟先得啦。」

阿仁點了點頭:「贊成,快啲去搵佢。」

我問了一問在那裡工作的同事,知道剛才那位高層的辦公室在樓上,便走上去嘗試搵佢了。殊不知,佢既唔響自己既辦公室,就連坐正響佢間房外面既同事,都冇一個知道佢去咗邊。我望一望錶,三點半了,離開記者會還只剩一個鐘頭。我唯有搵果度的同事,幫我留個口訊給那位高層,請他收到message後立即找我們。

我回到記者會現場,跟幾個一起來既同事一起準備。我們一直等,都等唔到notebook既主人出現。

四時十五分,那位高層終於出現響記者會現場:「喂,你哋搞掂晒未?」

我知道大鑊了。呢條高層響過去果個幾鐘,唔知閃咗去邊。從佢剛才既問題,我肯定佢並冇收到我既message。

「有冇搞錯呀!上唔到網你依家先講?」高層聽到我們將Lan Port鬆鬆地既問題提出之後大發雷霆:「陣間開開吓記者會斷咗線,你哋邊個賠呀?」

我本來想提議,將那些data抄過去另一部冇問題既notebook果度,但我望一望錶,離記者會開始時間還不到十五分鐘,我擔心時間唔夠。

「其實應該只係個Lan Port鬆鬆地,接觸點唔係好實淨遮。」阿仁向高層提議:「不如咁吖,我搵將膠紙幫你固定好條Lan線同個Port,我諗應該冇問題既。」

「應該?」高層聽完阿仁既建議之後,反而更火光了:「萬一中途啲膠紙甩咗咁點呀?你係咪傻架?」

我同阿仁當堂唔敢出聲。


「咁啦,與其你搵膠紙紙黐住,我寧要要安全。陣間記者會果陣,你哋搵個人企響我側邊,全程幫我襟實條線啦。」高層望住我:「阿哥仔,就你啦。」

「吓?」我覺得呢個方法實在戇居得過份,但係七叔交帶落,「人哋叫你做乜就做乜」,職責所在,我係冇得推的。

「阿哥仔你陣間醒定啲呀。」高層面色唔多好睇:「陣間如果中途有咩斷線呀、故障呀,我一定追究你地間公司的。」

記者會開始,高層上台講嘢,我則一碌木咁企響佢隔離,用一隻近乎麻痺既右手,襟實接駁去高層部notebook度既lan線。我隱約聽到,台下既觀眾見到台上有條低能仔,響度做人肉膠紙襟住條線,大概個畫面太搞笑吧,好多觀眾都忍唔住笑咗出嚟。果日既記者會,無線《今日財經》都有黎拍攝。我個木獨既衰相俾人影咗入鏡。同事們響電視度見到我,第二日返到公司,俾佢地笑到我面都黃。

呢件事令我好唔高興既原因係,當我全程企響呢個高層既側邊,「盡忠職守」地望住條線,慌死我手一鬆會搞垮佢地個press con既時候,記者會完結既一刻,我先發覺,所有既presentation data,根本全部都係store響高層部電腦既hardisk裡面。成個presentation既過程,佢跟本係完全冇需要connectinternet又或者intranet。只係唔知條高層發咩神經,係都要make sure部腦要接駁到去internet先安落。換句話講,我呢條傻仔,全程企響佢側邊俾人笑到面黃,其實係百份之百多九餘的。

俾人笑你低能,其實我還可以接受,冇問題的。不過記者會上既坐上客,我見到心穎同Marcus。男孩子響覺得自己好樣衰既時候,都係唔希望女朋友會見到的。呢次仲係近距離俾自己既女朋友同埋情敵一齊「見證」我既「瘀皮一刻」,我覺得丟假到想搵窿捐。

我響度諗,如果心穎既同事知道,企響高層隔離既果條傻仔,就係佢男朋友…我覺得實在係好丟心穎既假。

記者會完結之後,心穎走埋嚟搵我。我好擔心佢其他同事會發現,原來呢件蛋散就係佢既男朋友,所以當佢走埋嚟我果邊既時候,我只係尷尷尬尬敷衍咗佢兩句,然後就借詞急急腳彈開閃人了。心穎係個聰明既女孩子,佢見到我既反應,我當時諗緊乜,我知道佢其實feel得到的。只不過,男孩子害怕自己會令女朋友丟假既感覺,太恐佈了。那一刻既感覺,我諗我一世都會記得。

Click here to add 米梓橋 on your Facebook